Chih iŏk dôm tơdrong kăl đơ̆ng 'mi tih đak lơ̆p tôch dêh ƀât khei 11/2025, sơnăm 'nâu, tơdrong chă anih oei sơđơ̆ng ăn kon pơlei tơ̆ dôm tơring thŭng, tơring krê hơmơt đei dêh char Đắk Lắk tôch tơrek truh. Tơ̆ dôm xăh găh Hơlĕch dêh char, 100 tŏ hnam veh ver kơ đak lơ̆p ăn tơpôl hlôi man vă jê̆ đang, tơtom pơjao ƀât tŏk bŏk khei 9 ‘nâu. Kŭm hăm 'nŏh, dôm jĭt tŏ hnam veh ver kơ đak lơ̆p đei pơm pha ra băl kŭm đei man đơ̆ng dôm kơsô̆ jên yoa tơpôl vang tơgop. Tơ̆ dôm anih ưh đei hnam veh ver kơ đak lơ̆p, kon pơlei chă mong măi kon jên vă pơm hnam gak, tang găn đak lơ̆p tơ̆ hnam.

Tơmam sŏng xa, tơmam yoa kăl păng đak nhă vă măn hiă mưh đak lơ̆p kŭm jing tơdrong athei hơmet hơdrol kơtă lơ̆m hnam. Đơ̆ng đei tơpă tơ̆ yăn âu ‘nŏh lơ bơngai lơ̆m păng đơ̆ng rŏng kơ đak lơ̆p hrơ̆ ưh đei tôm tơmam xa, đak nhă păng hơbăn ao hrŭk, khăn, kơmŭng vă yua ƀât ‘măng ‘mi tih đak lơ̆p sơnăm sơ̆, kon pơlei chih iŏk tơdrong kăl ăn kơdih vă chă hơmet tôm tơmam lơ̆m pơyan mi tih, đak lơ̆p sơnăm ‘nâu.

Găh khŭl kơdră tơring păng dôm khŭl jang kơpal, tơdrong jang tang găn 'mi kial đak lơ̆p hlôi đei hơmet tôch 'lơ̆ng. Đơ̆ng hơdrol kơ pơyan 'mi, Anih vei lăng dơnâu đak păng tang găn 'mi kial hơbŭt (Anih tơm vei lăng Choh jang păng cham char) jang hơdai hăm Anih vei lăng Choh jang păng cham char dêh char Đắk Lắk, Anih jang găh kơchơ̆t bek ‘lơ̆ng (Anih tơm vei lăng jang pơgang) pơgơ̆r lăm pơtâp pơhrăm "Hơtŏk tơdrong jang đơ̆ng tơpôl mưh hơlen năng tơdrong krê hơmơt đơ̆ng 'mi kial păng vei lăng kơchơ̆t bek 'lơ̆ng gĭt kăl" tơ̆ Đắk Lắk. Kiơ̆ đơ̆ng noh, dôm bơngai hŏk 'noh jĭ dôm bơngai jang lơ̆m khŭl jang dŏng tơgŭm mưh đei tơdrong răm đơ̆ng 'mi kial, khŭl vei sơđơ̆ng tơpôl tơ̆ dôm xăh, phường… đei pơtho tơƀôh trong iŏk yoa tơmam hơlen năng tơdrong krê đơ̆ng tŏ 'mi kial lơ̆m tơpôl; băt hơdăh dôm tơdrong ƀônh pŭ răm; tơlĕch trong tang găn, tơjră mă lăp hăm tơdrong đei tơ̆ yăn âu tơ̆ tơring; pơtho tơƀôh trong hơmet păng vei lăng ‘lơ̆ng tơmam xa, mă loi hăm đe hơioh păng bơngai kră...

Ƀok Phương Văn Lành, Bí thư Đảng xăh Hòa Thịnh - mĭnh lơ̆m dôm xăh hơnơ̆ng đei đak lơ̆p găh Hơlĕch kơ dêh char Đắk Lắk, ăn tơbăt: "Xăh kŭm hlôi jang hơdai hăm Anih tang găn sar bar, tŏ 'mi kial kơnê̆ pơgơ̆r pơtâp pơhrăm pơtho tơƀôh trong tang găn sar bar, tŏ 'mi kial kơnê̆, tơjră hăm 'mi tih, đak lơ̆p ăn kon pơlei; hơdai hăm 'nŏh hơmet ming thŏng nan păng ao đông ăn dôm pơlei vă đe kơchăng. Găh noh dơ̆ng, xăh kŭm sơng iŏk bơ̆n canô kơmăy vă pơyoa ăn tơdrong jang tang găn sar bar, tŏ 'mi kial kơnê̆ tơ̆ hơnăp kơnh."

Kiơ̆ kơ ƀok Đào Mỹ, Phŏ Kơdră Anih vei lăng kon pơlei dêh char Đăk Lăk, dang ei dêh char tŏk bŏk chă hơlen năng, chih hơmet trong jang tơjră hăm ‘mi kial đak lơ̆p lơ̆m dôm khei hơtuch sơnăm 2026. Tơ̆ dôm xăh, akŏm jơhngâm hơmet kơjăp trong jang "4 kơtă", hơtŏk jơhngâm jang tơ̆ xăh; hơmet tơmam, kơmăy kơmŏk păng tơmam yua kăl tơ̆ dôm tơring krê hơmơt, pơm ‘lơ̆ng vă gơ̆h iŏk yua hloi.

Atŭm hăm noh, Anih vei lăng kon pơlei dêh char Đăk Lăk pơtho ăn dôm xăh pơjing trong jang hơdoi, jur tơgŭm tơ̆ dôm tơring găh pơbăh đak krong, dơnâu đak, tơring tơter đak dơsĭ păng dôm tơring krê hơmơt. Khŭl jang dŏng tơgŭm đơ̆ng dêh char truh tơ̆ xăh kŭm akŏm jơhngâm pơtâp pơhrăm, kơchăng bơ̆ jang dŏng tơgŭm mưh đei tơdrong krê: "Dang ei nhôn oei hơnơ̆ng hơmet pơ 'lơ̆ng Khŭl chĕp kơ̆l pơgơ̆r bơ̆ jang tang găn sar bar, vei lăng sơđơ̆ng ăn tơpôl tơ̆ tơring vă pơm lăp hăm tơdrong gơ̆h jang kơdih mưh tơjră hăm dôm tơdrong krê tơ̆ tơring."