100 tŏ hnam hơkŭm tơpôl atŭm hăm hnam veh ver đak hơbông đei pơtơm tơ̆ 27 xah, phương, hăm kơsô̆ jên asong ming man hloh 170 tih hlj iŏk đơ̆ng jên mong kơ dêh char Đăk Lăk. Tơdrong ming man pơtơm ah năr 27/6/2026. Dôm tơdrong ming man đei pơkăp 2 tăl, hăm 3 rup bieh man trŏ ƀlep hăm tơdrong joh ayŏ kơ rim tơring, drơh să 300m2 hăm rim tŏ hnam. Truh dang ei, tôm tơdrong ming man hlôi keh đang păng tŏk bŏk đei pơjao vă iŏk yua. Năm akŏm lêh et hơtŏk, ƀok Đặng Kim Hùng, oei tơ̆ thôn Ân Niên ăn tơbăt, tơdrong đei atăm hnam veh ver kơ đak hơbông tơgŭm ăn kon pơlei kơchăng hloh ah khei 'mi kial đak hơbông truh: “Minh ƀar unh hnam đei hnam kơđeh nhen ou ki, noh kon pơlei ƀơm lơ tơnap tap. Gơnơm đei teh đak tơgŭm pơm ăn hnam oei veh ver kơ đak hơbông thoi ou noh kon pơlei tôch chơt hơ-iă”

Vă tơdrong ming man gơh đei trŏ hơnih, ƀônh hiôk ăn kon pơlei iŏk yua, lơ unh hnam kơdih chă plang asong teh. Ƀok Nguyễn Liễm, tơ̆ thôn Hiệp Đồng, xah Hòa Xuân, hlôi asong pơhlom 450m² teh kơ unh hnam vă pơm hnam oei tơpôl atŭm hăm hnam veh ver kơ đak hơbông tơroi:  “Dang ei hnam keh đang kơjăp 'lơ̆ng, kơjung hloh  1m pơtêng hăm 'măng đak hơbông ou ki, noh kon pơlei chơt dêh, mưh đak hơbông tŏk dah mă 'mi kial noh akŏm pơđĭ tơ̆ hnam ou. Pơma atŭm tơ̆ 'noh dang ei sơđơ̆ng bơih”

Ƀok Nguyễn Thiên Văn, Phŏ Kơdră Hơnih jang vei lăng kon pơlei dêh char Đăk Lăk sơkơ̆t hơdah, dôm tơdrong ming man pơyua ăn tơpôl, pơm hloi hơnih oei veh ver sơđơ̆ng ah mă 'mi kial đak hơbông tŏk blai. Kơyuơ noh, rim xah phương athei vei lăng 'lơ̆ng, hơmet mă ƀlep vă gơh yua đunh khei năr; hơlen mă tôm gah unh hơyuh, đak sŏ nhă, kơtơ̆ng ang tơroi tơbăt vă kơchăng iŏk yua pơm hơnih oei sơđơ̆ng ƀơ̆t 'mi kial đak hơbông truh.

Ƀok Nguyễn Thiên Văn pơgơ̆r hăm rim hơnih jang păng rim xah, phương athei sơkơ̆t mă hơdah jăl mă 1 Tơdrong asong ming man hnam oei tơpôl atŭm hăm hnam oei veh ver kơ đak hơbông tơ̆ thôn, pơlei, tơring kơphô̆. Kiơ̆ đơ̆ng noh, hơlen pơih să truh dôm tơring hơnơ̆ng kơ ƀơm răm đơ̆ng 'mi kial đak hơbông, teh hơlih:  “Hơdrol hloh noh 'măn ăn tơdrong hơkŭm hŏk hôp kăp gĭt kơ thôn, pơlei, tơring oei xa. Mă kăl noh lơ̆m tơdrong jang tang găn păng tơjră 'mi kial 'noh tơguăt hăm chih akŏm trong jang 4 tơ̆ tơring, kơyuơ 'noh tơring athei dăr lăng mă tơnăp dôm tơdrong kăl nhen unh hơyuh, đak sŏ nhă, kơtơ̆ng ang tơroi tơbăt vă kơchăng pơm hơnih oei sơđơ̆ng ăn kon pơlei mưh đei 'mi kial đak hơbông truh”