Sơnăm 2026, tơdrong tơjră hăm sar bar, tŏ ‘mi kial kơnê̆ đei dêh char Đắk Lắk hơtŏk pran kiơ̆ trong jang roi kơchăng ƀiơ̆, hăm vă jê̆ 100 tŏ anih kơmăy pơtŏ đak ‘mi jur, 11 kơmăy roi tơbăt hơdrol đak lip; đĭ đăng xăh, phường pơjing khul jang vang tơjră hăm ‘mi kial đak lơ̆p, hăm hlŏh 11.000 ‘nu bơngai jang. Mă tơpă oei athei hơmet ming 1,2 tơdrong dơ̆ng, lơ̆m noh đei tơdrong jang hơdoi, roi tơbăt ăn băl mưh vei lăng dơnâu đak tơdăh đei ‘mi tih, đak tŏk. ‘Nâu jĭ ƀai hŏk đei Đắk Lắk chih iŏk đơ̆ng ‘mi tih đak lơ̆p tôch dêh lơ̆m khei 11 sơnăm sơ̆.

Pơma tơ̆ hop akŏm, Bí thư Đảng dêh char Đắk Lắk Lương Nguyễn Minh Triết athei vei kơjăp tơdrong roi tơbăt ăn băl rim tơdrong hăm dêh char Gia Lai găh đak ‘mi jur, đak tŏk păng tơdrong pơchoh đak đơ̆ng găh tu, hơdai hăm ‘nŏh athei roi tơbăt ăn kon pơlei mưh vă pơchoh đak. Đơ̆ng blŭng sơnăm truh dang ei, tŏ ‘mi kial kơnê̆ tơ̆ dêh char Đắk Lắk hlôi pơm ăn 2 ‘nu bơngai lôch, 109 tŏ hnam tơglơ̆h, hiong răm hlŏh 2,8 ti hlak jên.