Pơma pơtôch hop akŏm, Tổng Bí thư, Kơdră Tĕh đak pơma hơdăh drơ̆ng nơ̆r hăm hla ar chĭh roi tơbăt, rim nơ̆r athei đơ̆ng Anĭh chĕp kơ̆l kơ Anih pơgơ̆r jang Trung ương găh pơtôch yan âu păng chă tơchĕng hơlen hơmet ming, tơmơ̆t dơ̆ng Tơdrong hơgăt kơ Đảng păng trong jang hơmet ăn hô sơ pơtrŭh ăn Anĭh tơm Chĭnh trĭ, pơtrŭh ăn Hop akŏm Trung ương 4. Tổng Bí thư, Kơdră teh đak athei kăl hơmet pơ 'lơ̆ng trong tơlĕch jang pơtôch yan âu păng chă tơchĕng hơlen hơmet ming, tơmơ̆t dơ̆ng Tơdrong hơgăt kơ Đảng, vei sơđơ̆ng ƀlep trong tơlĕch jang, hơdăh tơmam drăm păng vei lăng đei tơdrong jang.

Kăl dăr lăng kơjăp rim jơ 'năr, athei hăm tơmam drăm păng trong jang lăng tơdrong 'lơ̆ng. Tổng Bí thư, Kơdră teh đak Tô Lâm tơroi rơđăh "Lăp chă tơchĕng hơlen tơmơ̆t lơ̆m tơdrong hơgăt dôm tơdrong hlôi đei pơtôch, lăng hơlen, đei tơdrong pơkăp, tơdrong tơm, sơđơ̆ng đunh đai păng kăl pơm kiơ̆ drơ̆ng mĭnh nơ̆r lơ̆m pơđĭ lơ̆m Đảng. Dôm tơdrong tim mă sơđơ̆ng kăl hơnơ̆ng chă tơchĕng hơlen, ưh kơ gơ̆h tơplih tơdrong tơchơ̆t lơ̆m tơdrong hơgăt."