Anih roi tơ băt teh tơdrŏ păng roi tơ băt hơ drol đak poh yă - Anih jang Vật lý Địa cầu, Anih jang Hàn lâm Khoa học păng Kơ măy kơ mŏk Việt Nam ‘nao tơ lĕch nơ̆r roi tơ băt hơ drol, kơ măy đơ̆ng Anih jang ‘nao chih iŏk 2 ‘măng teh tơdrŏ đei ƀôh tơ̆ tơ ring apŭng Kon Plông, dêh char Kon Tum. Kiơ̆ kơ ‘noh, 2 ‘măng teh tơdrŏ đei ƀôh ƀơ̆t 7 jơ 41 pơ nĭt kơ măng păng 8 jơ 32 pơ nĭt kơ măng ‘năr 8/11, đei jăng ‘noh 3.7 păng 2.9 độ.

Thoi noh, truh jơ năr âu, lơ̆m ‘năr 8/11, tơ̆ tơ ring apŭng Kon Plông, dêh char Kon Tum hlôi chih iŏk 3 ‘măng teh tơdrŏ đei ƀôh tơ̆ âu. Hơdrol ‘noh ƀơ̆t 6 jơ 1 pơ nĭt tơ̆ kơ sơ̆, 1 ‘măng teh tơdrŏ jăng 2.6 kŭm đei ƀôh tơ̆ hơ nih đei tọa độ (14.860 độ vĩ Bắc, 108.244 độ kinh Đông). Anih roi tơ băt teh tơdrŏ păng roi tơ băt hơdrol đak poh yă - Anih jang Vật lý Địa cầu kŭm tơ băt, oei tŏk bŏk răp hơ len lăng kơ jăp dôm ‘măng teh tơdrŏ âu.