VOV4.Bahnar - Kơsơ̆ năr 30/5, đei Thủ tướng teh đak drơ̆ng nơ̆r, Dơnŏ anih vei lăng Pơsat Ƀok Hô hlôi iung jang hơdoi hăm Dơnŏ anĭh tang măt Việt Nam tơ̆ Liên bang Nga păng Dơnŏ anĭh tơm chă tơchĕng khoa hŏk pơgang păng kơchơ̆t rơmă Liên ƀang Nga pơgơ̆r Hop akŏm pơtôch 30 sơnăm jang hơdoi vang vei lăng đunh đai, vei lăng sơđơ̆ng ‘lơ̆ng hơkâu kar Ƀok Hô (1992- 2022). 

Iung pơma tơ̆ hop akŏm, Thiếu tướng Bùi Hải Sơn -Kơdră chĕp pơgơ̆r Dơnŏ anĭh vei lăng Pơsat Ƀok Hô, Yŏng chĕp pơgơ̆r Khŭl kơdră vei lăng Pơsat Ƀok Hô tơbăt: kmăi kmŏk vei lăng hơkâu kar Ƀok Hô ‘nŏh jing kmăi kmŏk tôch gĭt kăl, ‘nŏh lăp hơdrô̆ Liên ƀang Nga mă đei. Mă lei hrei au, rim bơngai khoa hŏk Việt Nam hlôi gơ̆h pơjing, gơ̆h vei lăng ‘lơ̆ng hơ iă ăn hơkâu kar Ƀok Hô, mă lei jei oei ư̆h kơ gơ̆h ư̆h kơ đei rim ƀok thây ‘nŏh rim bơngai khoa hŏk Liên ƀang Nga. Việt Nam hơnơ̆ng chă tơchĕng, hơmet pơ ‘lơ̆ng rim tơdrong tim gan lăp, pơm pơ keh trong bơ̆ jang trŏ ƀlep păng tơdrong ƀô̆h hơdăh đơ̆ng jang yan au ăn rim bơngai joăt jang Việt Nam, roi năr roi jang gơ̆h hơgei tôm tong hlŏh dơ̆ng hăm kmăi kmŏk au.

Tơblơ̆ nơ̆r: Amazưt