Lơ̆m đon tơchĕng đơ̆ng lơ linh so vang năm tơblăh sơ̆, dôm khei ‘năr iung tơblăh ƀât blŭng sơnăm 1975 oei đei hơnơ̆ng. Hăm đe sư, rim anih, rim trong yak tơ̆ groi teh Tây Nguyên hơnơ̆ng đei kơjăp hăm dôm ‘măng tơblăh tih tôch krưp krĕnh păng tơdrong chu lôch tang đơ̆ng lơ bôl boăl. Trung tướng Đoàn Sinh Hưởng, Bơngai tơblăh kơtang nuih mơng kơ Kon pơlei, sơ̆ pơm Yŏng Khul linh Quân khu 4 – kơplăh dŏh sơ̆ jĭ Đại đội trưởng gre nar kơ Trung đoàn 273, Quân đoàn 3, năm tơblăh iŏk Buôn Ma Thuột – oei ƀlŏk hơnơ̆ng jơnăr tôch gĭt kăl doh sơ̆:

“Tơ̆ groi teh âu kơbăt dôm yơ bơngai lôch tang ‘mơ̆i mă gơ̆h iŏk đei jơnei ‘nâu. Tơring Buôn Ma Thuột mă bơ̆n hlôi tơblăh iŏk rơngei ‘nŏh jĭ tơring tôch gĭt kăl lơ̆m tơdrong tơblăh, atŭm hăm ‘nŏh tơblăh jơnei Buôn Ma Thuột kŭm pơjing tơdrong ‘lơ̆ng ăn dôm tơdrong tơblăh nai. Truh dang ei Buôn Ma Thuột, Đắk Lắk tôch ‘lơ̆ng, inh ƀôh kŭm tôch hơiă, hơiă mă lei kŭm ƀlŏk truh tơ̆ bôl boăl, ƀlŏk truh dôm bơngai hlôi lôch tang yoa teh đak ‘nâu, yoa groi teh ‘nâu sơ̆.”

Đơ̆ng tơdrong tơblăh jơnei tôch gĭt kăl âu, kơdrăn tơblăh tơ̆ tơring Pơbăh hlôi đei tơplih 'lơ̆ng, pơih trong ăn dôm tơdrong tơblăh đơ̆ng rŏng dơ̆ng năm truh tơdrong tơblăh jơnei tih Pơyan Puih mak sơnăm 1975. Kiơ̆ dôm bơngai tơchĕng hơlen găh khul linh, Tơdrong tơblăh Tây Nguyên ưh lăp 1 tơdrong jơnei tih găh khul linh đĕch mă oei đei lơ kơjă kăp gĭt găh trong pơgơ̆r tơblăh hai. Phó Giáo sư, Tiến sĩ Hoàng Xuân Nhiên, Tơ̆ Hnam hŏk khul linh teh đak, bơngai juăt tơchĕng hơlen găh trong tơblăh đơ̆ng khul linh Việt Nam akhan, 1 lơ̆m dôm tơdrong 'lơ̆ng đơ̆ng tơblăh Tây Nguyên 'nŏh jĭ trong tơhli tơblăh, tơhli păih âu tơblăh păih to:

“Lơ̆m tơdrong tơblăh Tây Nguyên tơdrong tơhli tơblăh đei ƀôh tôch hơdăh, ‘nâu kŭm jing ƀai hŏk tôch gĭt kăl ăn tơdrong vei lăng teh đak đơ̆ng hơdrĕch hơdrung bơ̆n lơ̆m chăl ‘nao. Lơ̆m khei ‘năr tơiung pơjing trong tơblăh đơ̆ng khul linh Việt Nam lơ̆m chăl hle athei hơnơ̆ng tơchĕng hơlen, tưk tơiung, iŏk yoa đei dôm kơjă kăp gĭt đơ̆ng chăl yă ƀok sơ̆ 'măn ăn vă bơ̆n gơ̆h tơblăh iŏk đei jơnei tih hlŏh dơ̆ng. Păng vei kơjăp teh đak bơ̆n truh ning mônh, vei lăng teh đak đơ̆ng hrôih, đơ̆ng hơtăih.”

Hlŏh 50 sơnăm đơ̆ng rŏng kơ tơblăh jơnei tôch gĭt kăl ‘nŏh, Tây Nguyên hlôi đei lơ tơdrong tơplih. Dôm tơring teh adrol sơ̆ tơblăh vang tôch krưp krĕnh dang ei jing tơring choh jang xa, pơtăm ‘long tôch xă, lơ jăl trong đei pơm hơmet, dôm tơring kơdrâm dar deh đei pơjing roi ‘lơ̆ng, tơdrong arih xa kơ kon pơlei dôm hơdrĕch hơdrung roi đunh roi tŏk pơdrŏng. Hăm đe linh vang năm tơblăh sơ̆, tơdrong tơplih ‘nao tơ̆ groi teh bri kông âu tơƀôh hơdăh tơdrong gĭt kăl đơ̆ng tơdrong chu hŭt hơkâu, lôch tang lơ̆m khei ‘năr tơblăh sơ̆.

Đại tá Nguyễn Đức Tính, Kơdră Chă pơma nuh kơ Tiểu đoàn 401 Đắk Lắk – Khul linh sơ̆ iŏk hơnăp jang tơblăh găn trong kơdŭn linh ayăt đơ̆ng Đắk Lắk năm tơ̆ Lâm Đồng lơ̆m tơdrong tơblăh Tây Nguyên – tơroi: “Đơ̆ng rŏng kơ tơblăh iŏk rơngei đang ‘nŏh tôch hơiă, truh dang ei tơdăh pơting hăm adrol sơ̆ ‘nŏh pha ra băl tôch dêh. Hơpơi ‘mĕh teh đak jang tŏk pran kiơ̆ Tơdrong tơchơ̆t đơ̆ng Hop akŏm Đảng ‘măng mă XIV ‘nŏh Đảng păng teh đak vă adrin jang tŏk truh 2 kơsô̆ đơ̆ng sơnăm 2026 păng hơmet ăn tơdrong pôk rơih bơngai tang măt Quốc hội ‘măng mă XVI păng Jơnŭm pơgơ̆r kon pơlei jơ̆p tơring ‘nŏh, inh lui teh đak bơ̆n gô tŏk pran, tơdrong arih xa kơ đe kôn mon kon sâu bơ̆n roi hiôk jơnap hlŏh dơ̆ng.”

Ưh lăp jơhngâm đon hưch hanh, čhôk ‘nă đơ̆ng đe linh vang năm tơblăh sơ̆ đĕch, Tơblăh jơnei Tây Nguyên oei tơiung đei jơhngâm hưch hanh ăn jơhnơr mơlôh hrei ‘nâu dơ̆ng. Mŏ Vũ Mai Hương, bơngai hŏk kao hŏk Luơ̆t tơ̆ Hnam trưng Đại học Luật Hà Nội – pơm tơ̆ Đắk Lắk ăn tơbăt, dôm tơdrong tơroi đơ̆ng kơdrăn tơblăh sơ̆ tơgŭm ăn jơhnơr mơlôh băt hơdăh kơjă kăp gĭt đơ̆ng tơdrong rơngei păng hơnăp jang đơ̆ng kơdih hăm pơlei pơla, teh đak.

“Kiơ̆ đơ̆ng dôm ƀai hŏk păng tơdrong tơroi găh Tơdrong tơblăh Tây Nguyên sơnăm 1975, nhôn jơhnơr mơlôh roi băt hơdăh ƀiơ̆ dôm tơdrong chu lôch tang hơkâu đơ̆ng chăl adrol. Tơdrong 'nŏh tơgŭm ăn nhôn roi 'mêm băt dôm kơjă kăp gĭt đơ̆ng tơdrong rơngei hrei 'nâu păng băt hơdăh hơnăp jang đơ̆ng kơdih lơ̆m tơdrong tơgop jơhngâm tơiung pơjing pơlei pơla, teh đak."

51 sơnăm hlŏh bơih, mă lei jơhngâm đon đơ̆ng tơblăh jơnei Tây Nguyên oei hơnơ̆ng păr ang. Đơ̆ng kơdrăn tơblăh vang sơ̆ truh trong yak lơ̆m khei ‘năr jang tŏk hrei ‘nâu, tơring teh bri kông oei hơnơ̆ng chih pơ ‘yoi dơ̆ng lơ tơdrong ‘nao hăm ƀĕnh đon hơmĕng jang tŏk, hăm đon adrin păng đon lui tôch kơjăp găh tơdrong arih ning mônh kơnh roi pơdrŏng, ‘lơ̆ng rŏ đơ̆ng teh đak.