Khŭl bơ̆jang kơ Anih tơm pơgơ̆r Khŭl lĭnh dêh char Đắk Lắk hlôi năm hơlen lăng tơdrong jang hơmet ăn pôk rơih păng hơnăp bơ̆ jang tơ̆ Trung đoàn Bộ binh 888, Trung đoàn 584 păng lơ xăh phường tơm nhen xăh Ea Kar, xăh Ea Ô, phường Buôn Hồ.

Khŭl hlôi hơlen lăng yan âu tơdrong jang vei sơđơ̆ng pơ rŏ ‘lơ̆ng bơ̆n hơnih, hơmet ăn hla kak dôm hơnih tăh kơphiê̆u pơyua ăn tơdrong pôk rơih bơngai tang măt Quốc hội jăl XVI păng bơngai tang măt Jơnŭm pơgơ̆r Kon pơlei jơ̆p tơring, jăl jang 2026 – 2031. Khŭl bơ̆jang lăng ‘lơ̆ng tơdrong kơchăng đơ̆ng rim anih jang lơ̆m vei kơjăp, tơlĕch jang tơpăt dôm tơdrong athei, trong tơlĕch jang găh tơdrong jang pôk rơih, pơgơ̆r roi tơbăt, pơtho ăn kang ƀô̆, khŭl lĭnh băt hơdăh tơdrong ‘lơ̆ng, tơdrong gĭt kăl đơ̆ng tơdrong pôk rơih, vei sơđơ̆ng trŏ tơdrong hơgăt, tơpăt păng sơđơ̆ng.