Kiơ̆ kơ noh, dang ei, jơ̆p teh đak đei jê̆ 79 triu bơngai tah hla, tơ̆ hloh 72 rơbou tơring tah kơphĭu, hăm tơdrong pôk rơih đei hơmet tôm tong đơ̆ng Trung ương truh tơ̆ tơring.  

Pơma ah jơ pơm jang, Kơdră Kuô̆k hô̆i Trần Thanh Mẫn ăn tơbăt, Kơdră Kuô̆k hô̆i akhan athei vei sơđơ̆ng tơpôl, vei sơđơ̆ng ăn tơdrong pôk rơih. Rim hơnih iŏk jang kơchăng băt tôm tơdrong, hơtŏk dôm trong jang vei sơđơ̆ng chinh trĭ, vei sơđơ̆ng tơpôl tơ̆ dôm hơnih pôk rơih, dah tom ƀôh băt păng sek tơlang dôm tơdrong đei ƀôh; kơchăng tơjră, tang găn dôm kơtơ̆ng ang ưh kơ trŏ lơ̆m mạng tơpôl, ưh đei lê̆ khul ayăt kơnê̆ iŏk năr pôk rơih vă pơm tơsŭl tơsăl; rim hơnih tah kơphĭu athei vei sơđơ̆ng, ƀônh hiôk ăn bơngai tah hla pơm trŏ sơnong kăp gĭt kơ po. Lơ̆m năr pôk rơih 15/3, athei pơtoi tơdrong tơroi tenh, trŏ ƀlep vă pơtruh ăn Hơnih tơm Chinh trĭ, Ƀan Ƀĭ thư păng dôm hơnih jang kơpal; rim Jơnŭm jang pơvih ăn Jơnŭm pơgơ̆r pôk rơih kơ teh đak athei hơmet tôm trong jang vă sek tơlang dôm tơdrong đei lơ̆m Năr pôk rơih.