Tơ̆ tơring Ia Lốp, tơring sơlam teh đak păh pơmơ̆t dêh char Dak Lăk, tơtil hăm dêh char Mondulkiri (Teh đak Campuchia), dôm năr ou, tơdrong kơtơ̆ng ang găh ‘măng pôk rơih đei pơma tơbăt lơ̆m rim ‘măng hop akŏm kon pơlei, rim ‘măng hop akŏm pơlei dăh mă lơ̆m aloa rapor kơ tơring. ‘Moi kiơ̆ rim kơtơ̆ng ang găh pôk rơih, bơngai tăh hla pơma dơnuh dih băl găh rim bơngai pơjei pôk rơih, găh tơdrong bơ̆ jang, tơdrong gơh jang păng dôm tơdrong tơgop đơ̆ng rim bơngai hơdrol vă rơih pôk tơmơ̆t bơngai bu. Bơngai tăh hla Lang Văn Tuyển, Bí thư chi ƀô̆ thôn Chiềng, tơring Ia Lốp tơbăt:“Hloh đơ̆ng bơ̆ jang pơrô̆ tơbăt ‘noh kon pơlei jei hlôh vao găh tơdrong kăl kơ năr pôk rơih păng kon pơlei jei tôch chơt hơ iă păng kon pơlei gô chang truh năr ‘noh năm tăh hla tôm”.

Lơ̆m ‘măng pôk rơih ‘măng mă ou, bơngai tăh hla tơring sơlam teh đak Dak Lăk pơtruh ăn jơhngơ̆m đon lui păng hơmŏ lơ̆m dôm bơngai tang măt gô tang măt ăn nơ̆r pơma kơ bơ̆n. Kiơ̆ đơ̆ng yă Vy Thị Hương, thôn Chiềng, tơring Ia Lốp, bơngai tăh hla hơpơi ‘meh vă rim bơngai tang măt mưh đei pôk tơmơ̆t gô lăng ba kơtang hloh dơ̆ng truh dôm tơdrong đei ƀôh yan ou kơ tơring sơlam teh đak nhen atŏk tơ iung trong hnam, pơm hơtŏk tơdrong hơrih sa kơ kon pơlei, pơjing đei tơdrong oei sa jang sa kơjăp ‘lơ̆ng, tơgop vei kơjăp sơđơ̆ng tơring păng tơdrong sơđơ̆ng dơ̆ng kơjăp tơring sơlam Teh đak.“Rim kơsơ̆ nhôn hơnơ̆ng mơ̆ng aloa rapor pơrô̆ tơbăt năm tăh hla. Kon pơlei jei hơpơi ‘meh vă đei bơngai đei jơhngơ̆m đon ‘lơ̆ng bơ̆ jang hơgei vă tơgŭm ăn kon pơlei hơrih sa đơ̆ng rŏng ou kơnh păng hơpơi ‘meh vă rim bơngai tang măt đei mơ̆t pơm kơdră tang măt gô lăng tông nông gia tơdrong hơrih sa kơ kon pơlei ‘lơ̆ng hloh dơ̆ng."

Atŭm hăm bơngai tăh hla tơ̆ pơlei pơla, khul ƀok thây kô pơtho tơ̆ tơring sơlam teh đak jei hơmŏ kơtang lơ̆m dôm bơngai tang măt lơ̆m jăl truh ou kơnh. Yă Huỳnh Thị Bích Vân, Kơdră chĕp pơgơ̆r Hnam trương Mầm non Thiên Nga, tơring sơlam teh đak Ia Rvê tơbăt, mĭnh hla kơphĭu oei pơtruh ăn nơ̆r hơpơi ‘meh vă đei dôm trong bơ̆ jang lăng truh pơtho pơhrăm tơring sơlam teh đak.“Nhôn tôch hơmĕng rim bơngai tang măt lăp đơ̆ng rŏng đei pôk tơmơ̆t gô lăng ba kơtang hloh dơ̆ng truh tơdrong pơtho pơhrăm, mă kăl pơtho pơhrăm mâm non tơ̆ tơring sơlam teh đak.”

Vă sơđơ̆ng ăn năr pôk rơih đei pơgơ̆r ƀlep hăm tơdrong tơchơ̆t, bơ̆ jang hơmet ăn tơ̆ rim tơring sơlam teh đak kơ dêh char Dak Lăk tŏk bŏk tơlĕch jang tĕnh koăng. Lơ̆m dêh char đei 16 tơring, phương sơlam teh đak, đei 4 tơring sơlam teh đak tơ̆ groi kông păng 12 tơring, phương tơter đak dơsĭ. Hơnăm bơngai tăh hla đei lăng hơlen tôch brĕ, dôm kơtơ̆ng ang găh rim bơngai đei hơnăn pơjei đei pơklep tơƀôh rơhao. Khul Ƀô̆ đô̆i vei lăng sơlam teh đak iung jang hơdoi hăm kơdră Đảng, Kơdră chĕp pơgơ̆r tơring atŏk kơtang pơrô̆ tơbăt, hơvơn kon pơlei vang năm tăh hla. Trung tá Trịnh Xuân Tuyên, Ƀĭ thư Đảng, Chinh trĭ viên Kơđông vei lăng sơlam teh đak Ia Rvê tơbăt:“Hơnih bơ̆ jang hăm khul kơdră đảng, kơdră chĕp pơgơ̆r tơring pơrô̆ tơbăt vă kon pơlei băt hơdăh găh hơnăp jang păng sơnong jang kơ dih mưh vang năm pôk rơih, adoi pơrô̆ hơvơn kon pơlei vang năm tăh hla tôm tong.”

Đại tá Đỗ Quang Thấm, Kơdră chĕp pơgơ̆r Đảng Hơnih Ƀô̆ đô̆i vei lăng sơlam teh đak dêh char Dak Lăk tơbăt, atum hăm pơrô̆ pơrôp bơngai tăh hla vang năm pôk rơih, khul ƀô̆ đô̆i vei lăng sơlam teh đak jei atŏk kơtang năm pơtrui, dăr lăng hơlen tơring sơlam teh đak. Ƀô̆ đô̆i vei lăng sơlam teh đak dêh char Dak Lăk xơkơ̆t hơdăh sơđơ̆ng dơ̆ng kơjăp, tơgop pơjing rơvơn vă bơngai tăh hla sơđơ̆ng jơhngơ̆m năm tăh hla:“Nhôn iung jang kơtang năm tơ̆ tơring, mă kăl dôm tơring gĭt kăl vă vei lăng sơđơ̆ng chinh trĭ, sơđơ̆ng dơ̆ng kơjăp tơpôl tơring sơlam teh đak. Adoi, pơgơ̆r atŏk kơtang năm pơtrui vei lăng sơđơ̆ng kơjăp tơring sơlam teh đak, vă sơđơ̆ng ‘lơ̆ng hơ iă hloh ăn ‘măng pôk rơih truh ou kơnh.”

Đơ̆ng rim pơlei pơla tơ̆ tơring sơlam teh đak, bơngai tăh hla Dak lăk tŏk bŏk hơmet ‘lơ̆ng ăn năr lêh tih kơ pơđĭ kon pơlei. Rim hla kơphĭu ưh khan lăp tơƀôh hơdăh hơnăp jang păng sơnong jang kơ kon pơlei, mă oei pơtruh jơhngơm đon lui kơjăp hăm bơngai tang măt, tang măt ăn jơhngơ̆m đon, tơdrong hơpơi ‘meh vă đơ̆ng kon pơlei, tơgop tơ iung pơjing tơring sơlam teh đak roi năr roi sơđơ̆ng dơ̆ng kơjăp păng atŏk tơ iung.