VOV4.Bahnar - Lơ̆m hla ar chih tơ mơ̆t dơ̆ng Hơ mĕng hơ tŏk tơ iung Châu Á (ADO) 2022 đei tơ băt hơ dăh ‘năr 21/7, Anih mong jên hơ tŏk tơ iung Châu Á (ADB) vei đêl so mŭk drăm tŏk ăn Việt Nam tơ̆ kơ sô̆ 6,5% lơ̆m sơ năm 2022 păng 6,7% lơ̆m sơ năm 2023, nhen đei tơ băt hơ dăh ƀơ̆t khei 4 sơ năm 2022. Kiơ̆ kơ ADB, mŭk drăm Việt Nam hơ nơ̆ng kơ tŏk, gơ nang đơ̆ng mơ dro sa oei đei pơ̆ih să păng tơ drong tơ iung ming hrĕnh hloh tơ chĕng hơ drol đơ̆ng tơ drong jang pơm tơ lĕch, năm vih vơ̆t lơ̆m teh đak păng tơ lĕch jên tơ mơ̆t jang teh đak. Mă đơ̆ng kơ jă tơ mam drăm jơ̆p plei teh tŏk măk, mă loi ‘noh jĭ kơ jă đak dâu jơ̆p plei tĕh, gô pơm hơ tŏk tơ drong hơ tŏk kơ jă lơ, mă lei hơ nih pơ truh phe ƀa măh mai lơ̆m teh đak gô tơ gŭm Việt Nam tơ jur tơ drong hơ tŏk kơ jă lơ lơ̆m sơ năm 2022. Kiơ̆ kơ ‘noh, ADB kŭm vei đêl so kơ sô̆ tơ dra hơ drol hơ tŏk kơ jă đơ̆ngViệt Nam tơ̆ kơ sô̆ 3,8% ăn sơ năm 2022 păng 4,0% ăn sơ năm 2023.

Thuem: Tơ blơ̆