Kuôk hô̆i khŏm mă hơtŏk tơmam drăm lơ̆m teh đak (GDP) đơ̆ng 10% tŏk tơ̆ kơpal, vă pơm trong hơtŏk kơjăp ăn tơdrong hơtŏk ah knao 2 kơsô̆ lơ̆m jăl jang truh ou kơnh. Tơchơ̆t ră hơdah: Sơnăm 2026 jing kăp gĭt hloh, pơgơ̆r Hop akŏm 'măng mă 14 kơ Đảng, pơgơ̆r pôk rơih bơngai jang tang măt ăn Kuôk hô̆i jăl 16 păng bơngai jang tang măt ăn Hô̆i đŏng kon pơlei dôm jăl jang sơnăm 2026 - 2031, jĭ sơnăm mă blŭng jang kiơ̆ Pơkăp hơtŏk mŭk drăm – tơpôl 5 sơnăm 2026 - 2030, yak ah jăl jang Hơtŏk tơ-iung pơdrŏng pran kơtang, jơnap kơ kon pơlei. Asong hơdrol vă hơtŏk kiơ̆ pơkăp vei sơđơ̆ng mŭk drăm, tang găn tơdrong huach kư̆ kă, vei sơđơ̆ng dôm tơdrong asong jang tih.

Tơchơ̆t tơlĕch hơdah 5 tơdrong jang tơm, lơ̆m noh: Hơtŏk mŭk drăm hơdrin đơ̆ng 10% tŏk tơ̆ kơpal. Tơdrong pơyua hăm rim 'nu bơngai jang đei 5.400 đôlar Mi. Kơsô̆ unh hnam hin dơnuh (kiơ̆ tơchơ̆t lơ trong) tơjur hloh 1%... Gah trong pơm jang, Kuôk hô̆i pơgơ̆r pơtoi hơtŏk tơ-iung tơguăt hăm vei sơđơ̆ng jang mŭk drăm tơm, tang găn huach kư̆ kă păng vei sơđơ̆ng tơdrong tơlĕch jang tih kơ tơdrong jang mŭk drăm. Jang atŭm kơjăp, hơbĕch hơbal đơ̆ng pơkăp jang jên hu păng dôm trong pơkăp jang nai. Pơtoi keh đang khôi luơ̆t đei tơrĕk truh tơdrong asong jang kơ teh đak, pơklaih dôm tơdrong tơhlăk tơhlĭn, tơjruh vă hơtŏk tenh tơdrong asong jên jang kŏng kơtă đơ̆ng blŭng sơnăm 2026, mă kăl dôm tơdrong asong jang kăp gĭt, dơnơm kơ teh đak păng dôm Tơdrong tơchơ̆t jang kơ teh đak.