Akŏm kơchơ Pơlei pơm jang păng tơmam pơkăp OCOP Việt Nam 'măng mă 18 păng Tơdrong pơlong tơmam pơm tơlĕch mih ngê̆ xơnăm 2022 jing 2 tơdrong jang tơm oei lơ̆m pơkăp 7 tơdrong jang kơ akŏm “Festival pơlei pơm jang Việt Nam xơnăm 2022” kơyuơ Anih tơm Choh jang xa păng Hơtŏk tơring pơxĕl pơgơ̆r.

Tơmam pơkăp OCOP Đăk Lăk tơ̆ anih pơdăh tơmam

Iŏk jang kiơ̆ Trong hơtŏk choh jang xa păng tơring pơxĕl kơjăp xơđơ̆ng jăl xơnăm 2021-2030, xơkơ̆t truh xơnăm 2050; Tơdrong pơkăp jang kơ teh đak găh pơjing tơring pơxĕl 'nao jăl xơnăm 2021 – 2025, akŏm kơchơ Pơlei pơm jang păng tơmam pơkăp OCOP Việt Nam 'măng mă 18 vă tơbang, pôk hơpăh ăn dôm pơlei pơm jang juăt jue; đe ngê̆ nhơ̆n rơgei đei dôm tơmam 'lơ̆ng, tơroi găh dôm pơlei pơm jang, tơdrong jang kăp gĭt lơ̆m jâ̆p teh đak; Tơroi tơbang tơdrong jang Rim xăh minh tơmam (Tơdrong pơkăp OCOP), tơroh tĕch tơmam pơkăp OCOP, minh ƀar tơmam kăp gĭt kơ dôm tơring hăm dôm tơdrong tĕch tơlĕch juăt jue păng 'nao dang ei. Atŭm hăm noh hơvơn axong jang, hơtŏk mŭk drăm joh ayŏ tơmang pơhiơ̆ păng tơdrong jang tơring pơxĕl, hơmet – hơtŏk tơdrong jang; hơtŏk tơroh tơdrong pơkăp kơjă đơ̆ng tơmam pơm đei truh tĕch tơlĕch, hơtŏk tơmam kơjăp xơđơ̆ng, rơgoh 'lơ̆ng hăm cham char.