Đắk Lắk jĭ dêh char răm kơtang hloh lơ̆m ‘măng ‘mi hơbŭt hơbông ou ki, hăm chih jô̆ blung a đei ƀôh lơ̆m dêh char đei 55 ‘nu bơngai lôch, 10 ‘nu hiong dong, hloh 150.000 pơbŭng hnam đak lơ̆p kơtang, akŏp hiong răm hloh 5.500 ti hlak jên. Dang ei đak hlôi och tơ̆ rim tơring, phương găh hơlĕch dêh char, pơjing rơvơn ăn rim khul tĕnh koăng iung jang tơgŭm djru kon pơlei. Bí thư Đảng dêh char Lương Nguyễn Minh Triết athei pơtho tơbăt ăn rim khul jang ‘mêm mơnat ba tơgŭm dôm tơmam drăm kăl ƀlep tơring, ƀlep bơngai; hrơ̆p mĭnh ‘măng vang iung jang hơmet pơ ‘lơ̆ng cham char, mă kăl tơ̆ hnam trương, hnam pơgang vă hrôih iung jang pơvih pơvăn ăn kon pơlei. Hơnih vei lăng Choh jang sa păng Cham char dêh char, Kŏng ang dêh char păng Hơnih Ƀô̆ đô̆i dêh char hlôi akŏm khul jang năm tơgŭm kon pơlei kôch hơmet dơ̆k, hyum rơ̆m rĕk, ming hơmet trong hnam, hơdrin hrôih pơjing đei tơdrong hơrih sa hiôk chơt dơ̆ng ăn kon pơlei.

Kơdră Anih vei lăng kon pơlei dêh char Đắk Lắk Tạ Anh Tuấn ‘nao năm truh tơ̆ rim tơring đei ƀơm ưh kơ ‘lơ̆ng kơtang vă hơlen lăng tơdrong jang dŏng tơgŭm păng hơmet ‘lơ̆ng hiong răm đơ̆ng ‘mi tih đak lơ̆p yua đơ̆ng Anih tơm pơgơ̆r Khŭl lĭnh dêh char tơlĕch jang. Dang ei kơ hrĕng ‘nu kang ƀô̆, khŭl lĭnh kơ Trung đoàn 584 păng Trung đoàn 888 tŏk bŏk tơgŭm kon pơlei kôch hơmet vĭ dơ̆k, hơmet ming tơmam, hnam trưng hŏk, hnam pơgang, tơlĕch jang tơdrong jang “Gŏ pai sa Lĭnh - Kon pơlei” vă vei sơđơ̆ng ‘măng sŏng sa, sơđơ̆ng tơdrong hơrih sa ăn kon pơlei tơring đak lơ̆p. Kơdră Anih vei lăng kon pơlei dêh char athei rim anih jang hơnơ̆ng jang kiơ̆ tơring, ưh kơ lê̆ kon pơlei pơngot, hơdai hăm athei rim anih jang bơ̆jang hơdai kơjăp hăm khŭl lĭnh lơ̆m tơdrong hơmet rơgoh cham char, rơgoh đak, jô̆ hơlen hiong răm păng tơgŭm tơiung ming jang sa, vă tơtĕnh sơđơ̆ng tơdrong hơrih sa, vei sơđơ̆ng jơhngơ̆m pran păng tơdrong jang sa đunh đai ăn Kon pơlei đơ̆ng rŏng ‘mi kial đak tih pơrăm.

Tơ̆ Gia Lai păng Khánh Hòa, bơ̆ jang tang găn jĭ jăn đơ̆ng rŏng ‘mi kial đak lip pơrăm tŏk bok tơlĕch jang kơtang vă vei lăng năng tông jơhngơ̆m pran jăng ăn kon pơlei. Hơnih vei lăng jang pơgang kơ ƀar dêh char ou hlôi ăn kơ mơjĭt ‘nu kang ƀô̆, bơngai jang năm truh rim tơring đak lip kơtang vă pruih pơgang hơmet pơ ‘lơ̆ng cham char, hơmet pơ ‘lơ̆ng tu đak sŏ nhă, pơtho ăn kon pơlei vei lăng năng tông kơdih, chă hyum akom rơ̆m rĕk, vă dă ƀiơ̆ đei pơrang jĭ pơrăm. Hơdrol kơ ‘noh, Hơnih tơm vei lăng jang pơgang hlôi akŏm đei vă jê̆ 10 tân pơgang hlŏng rơgoh đak păng rơbou kơdŭng pơgang ŭnh hnam tơgŭm ăn Khánh Hòa, Gia Lai, Đắk Lắk iung jang tang găn hơlou đơ̆ng rŏng ‘mi kial đak lip pơrăm. Hơnih jang pơgang pơkă athei kon pơlei ‘nĕ chă sŏ nhă đak tim mă pơm rơgoh, atŏk kơtang ,hơpuih hơmet pơ ‘lơ̆ng hnam oei, hơdroong kon tơrong, adoi iung jang hơdoi hăm hơnih bơ̆ jang lăng hơlen păng ƀôh hrôih dôm tơdrong hlĭch.