Tơ̆ hop akŏm, Khŭl pơgơ̆r Anih jang Đảng dêh char Khánh Hòa hlôi roi tơbăt hơdăh tơdrong tơchơ̆t ăn năm bơ̆jang, athei ƀok Trần Minh Thái, Bí thư Đảng ủy phường Bảo An, vang jang lơ̆m Khŭl chĕp kơ̆l pơgơ̆r păng pơm Bí thư Đảng ủy xăh Vĩnh Hải, jăl jang 2025 – 2030. Ƀok Hồ Xuân Ninh, Kơdră Anih vei lăng găh Kơmăy kơmŏk Mơdro sa, pơm Bí thư Đảng ủy xăh Ninh Sơn. Ƀok Trần Văn Thống, Phŏ Kơdră khŭl pơgơ̆r Anih jang Đảng dêh char, pơm Bí thư Đảng ủy phường Bảo An.

Pơma tơ̆ hop akŏm, ƀok Nghiêm Xuân Thành, Bí thư Anih jang Đảng dêh char Khánh Hòa, hmach chơt hơiă kơ dôm kang ƀô̆ đei ăn năm bơ̆jang, pôk hơtŏk, hơdai hăm pơma hơdăh ‘nâu jĭ dôm bơngai hlôi đei rơih iŏk tôch kơ hơlen, lăp hăm ‘meh vă hơnăp jang. Ƀok athei dôm kang bô̆ tơtĕnh iŏk jang tơdrong jang ‘nao, tơklep hăm tơlĕch jang tơdrong tơchơ̆t Hop akŏm Đảng bộ dêh char Khánh Hòa ‘măng mă I, jăl jang 2025 – 2030; hơtŏk tơdrong kĕ jang, hlôh vao, tơplih ‘nao trong bơ̆jang vă jang đang ‘lơ̆ng dôm hơnăp jang lơ̆m sơnăm 2025 păng dôm sơnăm đơ̆ng rŏng dơ̆ng.