Anih akŏm pơchơt hơdruh tơdăm đe hơ–ioh dêh char Đăk Lăk xă 3 ha, tơ̆ phương Tự An, pơlei tơm Buôn Ma Thuột.

Tơdrong ming man đei minh tŏ hnam pơm jang kơjung 2 tăl, xă 3.000 m2; minh dơnâu đak glơi păng 2 hơbon hnam yô chơgaih, hnam pơlơh hơbăn ao; cham ƀê tŏng xă 1.500 m2 păng ‘măng jang, chơnĕng pĕng tăp dăr. Tơdrong ming man đei jên axong jê̆  62 rơtăl hlj. Tơdrong ming man pơtơm đơ̆ng xơnăm 2013 păng keh đang ăh xơnăm 2017. Mă thoi noh, tơdrong ming man huach dôm jĭt rơtăl hlj âu ƀơm lê̆ hoh đơ̆ng noh truh dang ei. Ƀok Võ Đình Thận, jang ƀaoh vê̆ tơ̆ anih âu ăn tơbăt: “Inh jang tơ̆ âu đei 5 xơnăm kơ âu bơih, ƀôh đunh đunh noh đe đoan viên đei akŏm 1 – 2 ‘măng hia. Đơ̆ng năr inh oei noh ưh đei unh hơyuh, ưh đei đak, athei năm truh tơ̆ hnam kon pơlei tơjê̆ chă apinh xŏ nhă. Tơdrong ming man hư răm, đak ‘mi kơtoh ăh tăl mă 2, găh bơbŭng ăh anăp noh kial tơhlu tơpăr đĭ bơih”

Tơdrong ming mam lơ̆m hơgăt teh lê̆ hoh, noh kon pơlei iŏk pơm anih xơ̆k tơmam pơtăm đei păng tơ ‘nglaih rơmo. Pơmai Nguyễn Thị Thanh Mai, hnam tơkuh hăm Anih akŏm pơchơt hơdruh tơdăm hơ-ioh dêh char Đăk Lăk ăn tơbăt: “Inh ƀôh ưh gan akŏm ôh, adrol kơ pơrang jĭ Covid noh duh ƀôh găh đoan hơdruh tơdăm truh akŏm joh hơri đei 1 - 2 ‘măng hia, đơ̆ng rŏng kơ pơrang hơbuh noh pă đei ƀôh bơih. Đang kơ noh ƀôh lê̆ hoh noh kon pơlei đe tơ ‘nglaih vei kơpô, rơmo lơ̆m noh; tơmam choh pơtăm đei đunh đunh noh ƀôh chơ ‘nhăk xơ̆k lơ̆m noh”

Pơmai H’Giang Niê, Ƀĭ thư Anih jang đoan dêh char Đăk Lăk xơkơ̆t, Anih akŏm pơchơt hơdruh tơdăm đe hơ-ioh dêh char Đăk Lăk nhen lĕ ưh đei akŏm lơ̆m 5 xơnăm kơ âu. Dang ei lơ anih tŏk bŏk oei ƀơm hư răm. Tơdrong tơm noh kơyuơ ưh kơ tôm trong pơkăp jang, ưh đei pơjing akŏm jơnŭm pơgơ̆r. Anih jang đoan tŏk bŏk oei kơƀah 18 ƀiên chê̆, lơ̆m kơplăh pơkăp dang ei ưh axong pơjing ‘nao anih akŏm pơchơt. ‘Nguaih kơ noh, ƀơ̆t tơdrong ming man keh đang ăh xơnăm 2017 noh dôm jăl trong nơnăm lơ̆m tơring âu tam mă keh đang.  

Pơmai H’Giang Niê ăn tơbăt, Anih jang Đoan dêh char hlôi đei hla bar pơtruh nơ̆r hăm Anih vei lăng kon pơlei dêh char Đăk Lăk axong thêm jên vă ming hơmet dôm anih hư răm; atŭm hăm noh axong pơkăp ƀiên chê̆ pơjing jơnŭm pơgơ̆r pơm jang ăn anih jang; jang atŭm hăm jơnŭm jang tơpôl, jơnŭm pơgơ̆r tơring atŭm vang jang vă hơ ‘nhăk anih akŏm tơmơ̆t pơm jang: “Nhôn hlôi pơgơ̆r Anih jang đoan pơlei tơm Buôn Ma Thuột atŭm jơhngơ̆m hăm khul đoan viên hơdruh tơdăm kơ anih jang đoan dêh char pơm jang dôm tơdrong jang hơdruh tơdăm vă vei xơđơ̆ng tơdrong guăng rŏ ăn anih akŏm pơchơt. Jang atŭm hăm Anih vei lăng kon pơlei phương Tự An tơroi pơtho rim unh hnam kon pơlei ưh đei hơchăng vei kon tơrong, iŏk yua cham akŏm vă chă xơ̆k tơmam drăm âu to. ‘Nguaih kơ noh, Anih jang đoan dêh char adoi tơroi tơbăt ăn rim unh hnam tăp dăr pơtho kon hơ-ioh po ưh đei mơ̆t tơ̆ dơnâu đak glơi vă tang găn xar bar”