Pơma pơtôch jơ bơ̆ jang, Tổng Bí thư akhan, Khul chĕp kơ̆l Đảng Quốc hội tôch kơchăng, bơ̆ jang pran ‘lơ̆ng mưh chĕp kơ̆l pơgơ̆r, chih hơdăh dôm trong jang đơ̆ng Đảng; tơdrong chih pơjing luơ̆t đei lơ tơplih ‘nao, đei yoa tơ̆ yăn âu; mă loi pơgơ̆r đang ‘lơ̆ng tơdrong pôk rơih Quốc hội jăl XVI păng Jơnŭm pơgơ̆r kon pơlei jơ̆p tơring đơ̆ng 2026–2031.

Tơ̆ hơnăp kơnh, Tổng Bí thư athei hơnơ̆ng jang kiơ̆ mă ‘lơ̆ng Tơdrong Tơchơ̆t đơ̆ng Hop akŏm mă XIV, tơklep hăm rim tơdrong jang, trong jang mă hơdăh; hơtŏk hrĕnh trong pơgơ̆r, chih hơdăh trong jang đơ̆ng Đảng, hơtŏk tơdrong ‘lơ̆ng mưh chih pơjing luơ̆t, dăr lăng, pơm lăp hăm tơdrong hơmĕng đơ̆ng bơngai tăh hla păng kon pơlei.

Tổng bí thư pơma hơdăh: Đon lui, tơdrong hơmĕng đơ̆ng bơngai tăh hla păng kon pơlei lơ̆m teh đak gơih ăn ưh lăp đei lơ̆m hla kơphĭu đĕch mă oei tơƀôh hơdăh hăm dôm tơdrong tơchơ̆t trŏ ƀlep, dôm khôi luơ̆t ‘lơ̆ng hơiă, dôm tơdrong jang dăr lăng tôch đei yoa. Dôm trong jang, tơdrong tơgŭm tih đơ̆ng Đảng athei đei chih hơdăh jing tơdrong jang chih pơjing luơ̆t, dôm tơdrong tơchơ̆t rơđăh ‘lơ̆ng.