Jăl I/2026, tơdrong hơtŏk tơ-iung kơ dêh char Đăk Lăk đei pơhlom 7,5%, kơsô̆ jên asong jang lơ̆m tơpôl đei hloh 12.200 tih hlj, tơmơ̆t lơ̆m jên mong hloh 5.000 tih hlj. Tơ̆ hop akŏm, rim bơngai tang măt akŏm tơblang tơdrong tơm oei đei, atŭm hăm noh pơtruh nơ̆r hăm lơ tơdrong kăp gĭt tơrĕk truh trong pơkăp jang păng dôm tơdrong tơhlăk tơhlĭn lơ̆m pơm jang. Dôm nơ̆r pơtruh tơ̆ hop akŏm hăm Trung ương dah hrôih tơchơ̆t tơlĕch gah trong yua teh; pơklaih tơnap tap hăm dôm tơdrong jang oei tơhlăk; pơkăp hơdah gah tơdrong asong jên jang ăn tơdrong jang teh đak jăl sơnăm 2026–2030; atŭm hăm noh keh đang pơkăp gah jơnŭm pơgơ̆r jang, pơkăp tơdrong jang tơ̆ tơring.

Khul jang tang măt ăn Kuô̆k hô̆i dêh char Đăk Lăk ăn tơbăt, tơdrong pơtruh nơ̆r hăm trong pơkăp jang ưh hơdrô̆ pơklaih tơnap tap mă oei pơjing jơhngơ̆m pran vă hơtŏk tơ-iung kơjăp sơđơ̆ng. Khul gô akŏm tôm, pơtruh nơ̆r đơ̆ng kon pơlei ăn Kuô̆k hô̆i păng Trung ương vă tơgop keh đang trong jang, pơklaih hơnih tơhlăk păng pơkăp khôi luơ̆t ƀônh hiôk ăn hơtŏk tơ-iung lơ̆m jăl jang ou kơnh.