Lơ̆m sơnăm 2025, tŏ 'mi kial hlôi pơrăm kơtang gah kon bơngai păng mŭk drăm, hnam ou to, pơrăm truh tơdrong hơrih, tơdrong jang xa kơ kon pơlei păng dôm tơdrong jang mŭk drăm tơpôl. Jô̆ truh năr 31/12/2025, tŏ 'mi kial hlôi pơm 484 'nu bơngai lôch, hiong, 811 'nu bơngai rơka. Hơkŏp tơdrong răm jô̆ hơlen truh hloh 104.733 tih hlj. Pơma ah hop akŏm, Thủ tướng Phạm Minh Chính ră hơdah tơdrong tơchơ̆t noh vei sơđơ̆ng tơdrong hơrih ăn kon pơlei noh mă tơm; vei lăng mŭk drăm kơ teh đak, kon pơlei mă tơnăp; iŏk kon pơlei pơm tơm, tơ-'ngla lơ̆m tang găn păng tơjră tŏ 'mi kial pơrăm; tang găn păng tơjră tŏ 'mi kial pơrăm tơguăt hăm pơm jang 2 tơchơ̆t 100 sơnăm păng hơtŏk mŭk drăm tenh, kơjăp sơđơ̆ng păng tơgop hơtŏk kiơ̆ 2 kơsô̆.

Pơm kiơ̆ pơkăp "Kơchăng tang găn hơdrol – Tơroi mă hơdah – Tơroi mă trŏ - Tơjră mă tơtom", Thủ tướng pơgơ̆r hăm rim hơnih jang, rim tơring lơ̆m rim tơdrong đei ƀôh athei vei lăng jơhngơ̆m jăn, tơdrong hơrih ăn kon pơlei noh mă hơdrol, ưh gơh pơhơi pơhŏ; tang găn hơdrol păng tơjur răm; tôm noh kơyuơ tơdrong tơchơ̆t kơjung hloh noh tơdrong sơđơ̆ng 'lơ̆ng ăn kon pơlei.