Kô Lê Hiếu Vy, Bí thư Đoàn Hnam trưng THPT Ngô Gia Tự (phường Phú Yên) jĭ 1 ‘nu bơngai tang măt ăn dêh char Đắk Lắk đei hơpăh ăn tơmam hơpăh Lý Tự Trọng sơnăm 2026. Mŏ hơnơ̆ng kơchăng tơplih ‘nao trong jang vă krao akŏm đe đoàn viên, hŏk tro vang. Lơ̆m ‘măng ‘mi tih đak lơ̆p tôch dêh ƀât hơtuch sơnăm 2025, ưh hli tơdrong krê hơmơt, mŏ Vy krao akŏm đei hlŏh 30 ‘nu đoàn viên năm tơ̆ dôm tơring đak lơ̆p chơ pơtruh tơmam tơgŭm ăn kon pơlei oei pơngot rơvĕt tơngiĕt găng. Đon jang tơnăp, nuih đơ̆ng mŏ ưh lăp tơgŭm ăn kon pơlei yak hlŏh pơmat tat đĕch mă oei tơiung đei jơhngâm pran ăn hŏk tro, tơiung đon jang tơnăp păng băt tơgŭm băl.

Hăm mŏ Vy, tưk tơiung jơhngâm đon hưch hanh păng vang yak hơdoi hăm druh dăm ‘nŏh jĭ rei đon tơnăp, đon ‘mêm păng plang pơyơ̆r ăn tơpôl tơ̆ đe hŏk tro păng bôl boăl: “Mưh yak hơdoi ‘nŏh ba athei bơ̆ jang hơdoi hăm hŏk tro. Ƀôh ba vang jang ‘nŏh tơiung đei đon adrin đơ̆ng kơdih, ‘mĕh năm hơdrol đơ̆ng đe hŏk tro, vă akhan ba jang, đei trong pơlung băl ưh kơsĭ ba athei dăh mă pơgŏ kiơ̆. Hŏk tro gô chih măt păng lai yơ kŭm chih măt lơ hlŏh kơsô̆ kăl đei. Rim tơdrong jang gô jing 1 tơdrong đei bơ̆ jang kơdih  tôch hơiă hăm đe oh”.

Gơnơm đei trong jang rơgei, đei yoa, đơ̆ng 2020–2025, Đoàn hnam trưng THPT Ngô Gia Tự jĭ 1 lơ̆m dôm khul jang rơgei kơ dêh char Đắk Lắk. Hơdrô̆ sơnăm 2025, Hnam trưng Ngô Gia Tự đei 8 ‘nu hŏk tro chơt hơiă đei iŏk tơmât jang Đảng.

Kŭm hăm hnam trưng, tơdrong jang đoan oei tơlĕch jang tơ̆ Đắk Lắk hăm tơdrong tơm ‘nŏh jĭ bơ̆ jang ‘moi kiơ̆ tơđrong ‘mĕh vă tơ̆pă tơ̆ tơring. Tơ̆ phường Buôn Ma Thuột, đơ̆ng rŏng bơ̆ jang kiơ̆ trong Khul kơdră pơgơ̆r tơring 2 tăl, đoàn viên druh dăm đei pơjao tơdrong jang tôch rơđăh, vang tơgŭm ăn kon pơlei pơm bơ̆n hla ar trư̆k tuyê̆n, pơtho tơƀôh trong iŏk yoa kơmăy sô̆ kơtă tơ̆ tơring kon pơlei oei xa.

Kiơ̆ mŏ Lê Thị Anh Trâm, Bí thư Đoàn phường Buôn Ma Thuột, druh dăm ưh đei jang tơplih ăn mă pơtho tơƀôh vă kon pơlei hlôh vao, gơ̆h pơm kơdih, đei đon kơchăng bơ̆ jang hăm kơmăy sô̆: “Khei ‘năr âu ki, đoàn phường kŭm pơjing khul jang tơgŭm kơtă tơ̆ Anih pơm hla ar ăn tơpôl kŭm nhen jur truh tơ̆ 89 kueng kơphô̆ păng pơlei. Ưh lăp dơ̆ng ƀât, băt pơm tơgŭm ăn kon pơlei đech mă oei pơtho ăn đe sư băt, gơ̆h iŏk yoa kơmăy sô̆ chă pơm bơ̆n hla ar lơ̆m mang”

Ƀât oei hăt bơ̆ jang kiơ̆ trong Khul kơdră pơgơ̆r tơring 2 tăl, nơ̆r athei đei tơlĕch hăm khul jang Đoàn ‘nŏh athei rơih trŏ tơdrong, pơjao trŏ bơngai, tưk tơiung đei đon tơnăp ăn druh dăm tơ̆ tơring. Mưh tơdrong jang đei chih hơdăh, ưh pă đei tơrăih jơ̆p jang mă đei pôi akŏm rơđăh ‘lơ̆ng ‘noh gô bơ̆ jang roi đei yoa.

Lăp 1 khei ‘năr ưh đunh, dôm khul druh dăm năm jang tơgŭm tơ̆ Đắk Lắk vang tơgŭm ăn dôm jĭt rơbâu ‘nu kon pơlei pơm bơ̆n hla ar hăm kơmăy sô̆. ‘Nâu jĭ khul jang tôch gĭt kăl, jĭ gơng tơƀưh đơ̆ng khul kơdră tơring hăm kon pơlei, mă loi ‘nŏh tơ̆ tơring hơtăih yăih. ‘Nhŏng Lương Minh Tùng, Bí thư đoàn dêh char Đắk Lắk pơma hơdăh, vă pơm lăp hăm tơdrong ‘mĕh vă ‘nao, khul jang Đoàn athei hơnơ̆ng tơplih ‘nao trong bơ̆ jang, ‘moi kiơ̆ tơ̆ yăn âu.

“Anih jang đoàn athei tơplih mă ‘lơ̆ng tơpă. Kăn ƀô̆ đoàn tơ̆ tơring athei bơ̆ jang hloi tơdrong jang chinh trĭ tơ̆ tơring. Sơnăm ‘nâu kăn ƀô̆ đoan tơ̆ tơring rơih đei lơ tơdrong jang tơm, gĭt kăl, lăp hăm rim tơdrong tơ̆ tơring, mă loi ‘nŏh đơ̆ng rŏng tơmât hơdai, vă kiơ̆ đơ̆ng noh gơ̆h iŏk jang dôm tơdrong pơmat, dôm tơdrong jang kăl đei druh dăm bơ̆ jang lơ̆m khul kơdră pơgơ̆r tơring 2 tăl.”

Ƀok Y Giang Gry Niê Knơng, Phó Bí thư Đảng dêh char, Kơdră Anih MTTQ Việt Nam dêh char Đắk Lắk akhan, lơ̆m tơdrong 'nao, anih jang đoan athei hơnơ̆ng tơplih mă pran trong bơ̆ jang, lăp hăm trong jang tŏk lơ̆m chăl 'nao, đoàn viên, druh dăm athei jing khul năm hơdrol lơ̆m tơdrong tơplih 'nao, rơgei păng tơplih hăm kơmăy sô̆, dôm tơdrong jang gĭt kăl vă atŏk tơiung tơring, teh đak. Hăm tơdrong hŏk iŏk hrĕnh, đei đon rơgei, gơ̆h bơ̆ jang hăm kơmăy kơmŏk 'nao, druh dăm jĭ khul gơ̆h tơlĕch dôm đon tơchĕng, jang kiơ̆ hăm kơmăy sô̆ tơ̆ yăn âu, vang tơgop pơm hơtŏk tơdrong jang tŏk mŭk drăm tơpôl păng tơƀôh hơdăh anih dơ̆ng đơ̆ng tơ 'ngla teh đak ning mônh kơnh.

“Tơplih hăm kơmăy sô̆ đei năng jĭ tơdrong tơm vă jang tŏk păng druh dăm athei iŏk jang hơdrol tơdrong ‘nâu. Ưh lăp năm hơdrol găh iŏk yoa kơmăy đĕch, mă oei athei jing khul jang tơm vang tơgŭm ăn kon pơlei chă pơm bơ̆n hla ar trư̆k tuyê̆n, hơmet ming trong pơm hla ar vei lăng. Tơdrong jang đơ̆ng Đoàn ‘nŏh athei hơnhăk kơmăy sô̆ vih tơ̆ pơlei pơla, pơtho ăn kon pơlei tơdrong rơgei ‘nao, khŏm sut pơđĭ dôm tơdrong oei găn trong kơplăh tơring kơdrâm hăm tơring tơrang, tơring hơtăih yăih”.

Ƀât mă tơdrong athei vă jang tŏk roi đunh roi kơjung, dêh char Đắk Lắk chih hơdăh druh dăm jĭ 1 lơ̆m dôm khul jang gĭt kăl vă bơ̆ jang đei tơdrong hơpơi ‘mĕh jang tŏk, atŭm hăm ‘nŏh jĭ ‘long pơtŏ ăn tơdrong jang tŏk pran kơjăp. Yoa thoi noh, tơdrong tưk tơiung hơnăp jang, đon tơnăp păng hơpơi ‘mĕh plang pơyơ̆r ăn tơpôl đơ̆ng jơhnơr mơlôh gô hơnơ̆ng jing tơdrong tôch gĭt kăl, vang tơgop pơjing Đắk Lắk jang tŏk hrĕnh păng pran kơjăp./.