Tơ̆ lêh pơtơm, Jơnŭm pơgơ̆r jang kơ teh đak gah chơ chă sir kôch akŏm păng sơkơ̆t hơdah hơnăn kơting linh lôch tang pơkăp lơ̆m 500 măng năr, hơdrin chơ chă sir kôch akŏm đei 7.000 kơting linh lôch tang păng sơkơ̆t hơdah hơnăn đei pơhlom 18.000 hơnăn linh lôch tang. Khei năr Tơlĕch pơm jang đơ̆ng năr 15/3/2026 truh năr 27/7/2027.

Pơma ah lêh pơtơm, Phŏ Thủ tướng Phạm Thị Thanh Trà pơgơ̆r hăm rim hơnih jang tơm, rim tơring athei pơm jang tơnăp, tôm tong păng kơchăng, lơ̆m noh, akŏm lơ̆m dôm tơdrong jang tơm, kăl sơkơ̆t hơdah sơnong jang chinh trĭ kăp gĭt; kăl chih akŏm hơlen lăng kơjăp tơpă; tơplih trong pơm jang kiơ̆ trŏ pơm jang kiơ̆ khua hŏk kơmăi kơmŏk 'nao; iŏk yua sơnong dơnơm kơ khul jang păng hơvơn tơdrong vang jang đơ̆ng tôm tơpôl; athei hơtŏk jang hơdoi apŭng plenh teh, mă kăl noh hăm dôm teh đak buăl Lào păng Campuchia.