VOV4.Bahnar - Hơ nơ̆ng tơ drong jang ‘măng hop akŏm mă 15, pơ gê hei (14/09), mĭnh tơ drong gĭt kăl đei bơ ngai tăh hla păng Kon pơ lei bơ ngơ̆t truh, ‘noh jĭ Anih chĕp kơ̆l Kuôk hô̆i ăn tơ gop nơ̆r găh hla ar tơ roi tơ băt pơ tôch dăr hơ len “ Tơ drong bơ̆ jang kiơ̆ trong jang tơ gŭm, khôi luơ̆t găh bơ̆ jang ‘mơ ‘met, tơ jră brăh brư jăl jang 2016-2021”. ‘Nâu jĭ 1 lơ̆m 2 tơ drong jang dăr hơ len gĭt kăl đơ̆ng Kuôk hô̆i lơ̆m sơ năm 2022. Tơ roi tơ băt đơ̆ng khŭl dăr hơ len akhan, hơ dai hăm dôm jơ nei iŏk đei ‘noh tơ drong pơ jing jên vă jang rim sơ năm đơ̆ng jên jang teh đak tam mă ƀlep hăm yan âu.

Tơ drong jang tơ mơ̆t jên jang hơ dai, tơ jur jên jang jăl jang 2016-2020 tôch kơ hiơ̆; jên tơ mơ̆t jên jang tơ̆ 1,2 anih jang mơ dro sa teh đak tam mă đei vei sơ đơ̆ng ‘lơ̆ng. Tơ drong vei lăng, iŏk yua teh, mŭk drăm teh đak tơ̆ 1,2 anih tơm, anih jang, tơ ring ưh kơ ƀlep tơ drong hơ găt; oei đei tơ drong iŏk yua glăi, lê̆ ƀrăh ƀrư. Tơ drong ‘lơ̆ng, trong tơ lĕch jang iŏk yua teh oei tŏ sĕt, chĕng hơ met teh lê̆ hoh, tơ drong jang lê̆ hoh oei tih; kơ sô̆ hơ găt teh tam mă iŏk yua, lê̆ brăh brư dăh mă iŏk yua glăi tơ drong tơm oei đei ƀôh tơ̆ vă đĭ đăng rim tơ ring.

Thuem: Tơ blơ̆