VOV4.Bahnar - Hơ nơ̆ng ‘măng hop akŏm tơ drong jang khôi luơ̆t khei 9, năr ‘nâu (21/09), Anih chĕp kơ̆l pơ gơ̆r Kuôk hô̆i ăn tơ gop nơ̆r găh tơ drong roi tơ blang, chih răk, hơ met ming găh Luơ̆t Khăm jĭ, hơ met jĭ ( hơ met ming). Chih iŏk dôm nơ̆r tơ gop đơ̆ng bơ ngai tang măt Kuôk hô̆i tơ̆ ‘măng hop akŏm mă 3, truh dang ei Luơ̆t Khăm jĭ, hơ met jĭ ( hơ met ming) hơ găt kơ jă khăm jĭ, hơ met jĭ đei băt hơ dăh kiơ̆ lơ̆m jên jô̆ tôm dôm tơ drong kăl kơ jên, lăp hăm tơ drong kĕ kla păng pơ trŭt hơ tŏk ‘lơ̆ng, hơ tŏk tơ iung ki thuơ̆t joăt jang. Hơ drol ‘noh, tơ̆ Hop akŏm bơ ngai tang măt Kuôk hô̆i joăt jang âu ki, dôm bơ ngai tang măt akhan, kăl kơ đei trong jang tơ gŭm hơ drô̆ ăn tơ drong jang pơ vih pơ văn khăm, hơ met jĭ păng tơ drong jang răt tơ mam pơ gang, kơ măy kơ mŏk pơ gang kơ teh đak, vă vei sơ đơ̆ng pơm lăp ‘meh vă tơ tom dôm tơ drong ‘meh vă khăm, hơ met jĭ păng pơm đei tơ drong pơ jei hơ tŏ băl đơ̆ng dôm kơ loăi khăm, hơ met jĭ.

Kơ dră Kuôk hô̆i Vương Đình Huệ tơ̆ jơ hop akŏm

Dôm bơ ngai tang măt kŭm akhan: tơ drong tơ hlăk hloh păng gĭt kăl hloh hăm anih jang pơ gang hrei ‘nâu ‘noh jĭ jang hơ dai đơ̆ng teh đak - kơ dih, yua thoi noh athei hŭt lê̆ tơ drong jang tơ pôl vang tơ gop găh jang pơ gang. Yua ưh kơ gơh tơ pôl tơ gop hăm trong kơ dih tơ lĕch jên atŭm hăm hnam pơ gang răt kơ măy, tăh lơ̆m hnam pơ gang iŏk yua đang kơ ‘noh klaih song băl jên lơi.

Thuem: Tơ blơ̆