VOV4.Bahnar - Hơ nơ̆ng tơ drong jang ‘măng hop akŏm mă 9, pơ gê ‘năr 24/3, Anih chĕp kơ̆l pơ gơ̆r Kuôk hô̆i set hơ len tơ roi tơ băt pơ tôch yak blŭng đơ̆ng khŭl dăr hơ len tơ drong jang “ Tơ drong bơ̆ jang kiơ̆ trong jang tơ gŭm, khôi luơ̆t găh pơm kiơ̆ ‘mơ ‘met, tơ jră brăh brư jăl jang 2016-2021” păng tơ chơ̆t tơ drong rơ̆ih iŏk anih jang, tơ ring vă pơ gơ̆r dăr hơ len yan âu. Tơ drong jang dăr hơ len “ Tơ drong bơ̆ jang kiơ̆ trong jang tơ gŭm, khôi luơ̆t găh pơm kiơ̆ ‘mơ ‘met, tơ jră brăh brư jăl jang 2016-2021” gô tơ gop gĭt kăl lơ̆m tơ drong ‘mơ ‘met jên jang teh đak, bơ ngai jang, tơ mam, jang hơ gei. Yua thoi noh, tơ drong băt hơ dăh tơ drong tơm păng trong vă jang dăr hơ len hơ dăh hăm rim anih tơm, anih jang, tơ ring; băt hơ dăh tơ drong jang đei ƀôh brăh brư, pơ ma tơ gŭm, lăng băt dôm tơ drong đei ƀôh âu ‘noh dôm tơ drong đei bơ ngai tăh hla păng kon pơ lei tôch kơ bơ ngơ̆t truh păng răp hơ len đơ̆ng khŭl dăr hơ len. Kŭm lơ̆m ‘năr  24/3, Anih chĕp kơ̆l Kuôk hô̆i set hơ len, pơ drơ̆ng kiơ̆ hla ar chih tơ drong tơ chơ̆t găh bơ̆ jang apĭnh jet tơ̆ ‘măng hop akŏm mă 9.

Thuem: Tơ blơ̆