VOV4.Bahnar - Kơ sơ̆ brei (15/9), tơ gop nơ̆r găh tơ drong hơ met ăn ‘măng hop akŏm mă 4 kơ Kuô̆k hô̆i jăl 15, Tổng Thư ký Kuô̆k hô̆i, Kơ dră vei lăng Anih jang kơ Kuô̆k hô̆i Bùi Văn Cường ăn tơ băt, tơ chĕng adrol, akŏm đĭ đăng năr bơ̆ jang lơ̆m hop akŏm mă 4 ‘nŏh 23 năr 1 puăt. Kuô̆k hô̆i vă pơ gơ̆r hôp lơ̆m ‘năr 20/10.

Jơ hop akŏm kơ Anih chĕp kơ̆l pơ gơ̆r Kuô̆k hô̆i

Tổng Thư ký Kuô̆k hô̆i Bùi Văn Cường tơ roi dơ̆ng, Khul kơ dră tĕh đak athei chih tơ mât dơ̆ng tơ drong vă tơ roi ăn Kuô̆k hô̆i set hơ len, tơ chơ̆t Trong tơ prŏh trong jang atŭm kơ tĕh đak đơ̆ng 2021-2030, trong vă jang truh sơ năm 2050; tơ roi ăn Kuô̆k hô̆i set hơ len, pơ drơ̆ng nơ̆r ăn tơ drong Tơ chơ̆t găh jang pơ long năng tơ drong gơh rơih, iŏk yoa kơ ƀang sô̆ gre ô tô rơih bơ ngai răt păng set hơ len, pơ drơ̆ng nơ̆r ăn tơ drong tơ chơ̆t găh jang pơ long năng 1,2 trong tơ gŭm hơ drô̆ vă atŏk tơ iung pơ lei tơm (plt) Buôn Ma Thuột, dêh char Dak Lak păng set hơ len trong sek tơ lang tơ drong tơ hlăk tăk, ưh kơ lăp tơ̆ 1,2 anih thu jên gre kơ dâu vih vât/tơ drong jang BOT. 

Đơ̆ng rŏng kơ ‘nŏh, Anih chĕp kơ̆l pơ gơ̆r Kuô̆k hô̆i pơ gơ̆r jơ hôp pơ tôch hop akŏm mă 15, pơ ma pơ tôch hop akŏm, Kơ dră Kuô̆k hô̆i Vương Đình Huệ athei dôm anih jang hơ nơ̆ng chih pơ ‘lơ̆ng hla ar tơ roi dăr lăng kiơ̆ tơ drong jang, mă loi jĭ Hla ar chih tơ roi găh tơ drong dăr lăng "Bơ̆ jang kiơ̆ trong tơ gŭm, khôi luơ̆t ‘mơ ‘met, tang găn pơ huach kư̆ kă đơ̆ng 2016-2021” vă tơ roi ăn Kuô̆k hô̆i lơ̆m hop akŏm mă 4, Kuô̆k hô̆i jăl 15.

Dơ̆ng: Tơ blơ̆