VOV4.Bahnar - Pơ gê ‘năr (22/8), Kơ dră Kuôk hô̆i Vương Đình Huệ hlôi pơ gơ̆r Hop akŏm hơ len lăng tơ drong jang kiơ̆ trong tơ lĕch jang kơ sô̆ 81 đơ̆ng Anih chĕp kơ̆l pơ gơ̆r Kuôk hô̆i jăl XV păng tơ lĕch tơ drong jang pơ jing luơ̆t, tơ drong tơ chơ̆t. Tơ̆ hop akŏm, Kơ dră Kuôk hô̆i Vương Đình Huệ akhan tơ drong jang kiơ̆ pơ tôch đơ̆ng Anih tơm Chĭnh trĭ păng tơ lĕch jang đơ̆ng Anih chĕp kơ̆l pơ gơ̆r Kuôk hô̆i vă jê̆ 1 sơ năm âu ki hlôi iŏk đei jơ nei tôch kơ ‘lơ̆ng păng gĭt kăl. Tơ drong jang pơ gơ̆r tơ lĕch jang kiơ̆ ‘lơ̆ng, tơ tĕnh păng đei iŏk yua.

Truh dang ei, Kuôk hô̆i hlôi tơ lĕch 6 Luơ̆t, 8 tơ drong Tơ chơ̆t. Anih chĕp kơ̆l pơ gơ̆r Kuôk hô̆i hlôi tơ lĕch 2 tơ drong tơ chơ̆t păng  2 tơ drong hơ găt. Tơ chĕng hơ drol ‘măng hop akŏm Kuôk hô̆i mă 4 truh gô set hơ len 7 Luơ̆t, 1 tơ drong tơ chơ̆t păng set hơ len ‘măng mă blŭng 7 luơ̆t nai. Kơ dră Kuôk hô̆i athei anih jang ƀơm truh lăng kăl truh tơ drong ‘lơ̆ng dôm Luơ̆t, vei sơ đơ̆ng tơ drong jang hăm dôm hơ năp jang pơ jing khôi luơ̆t uơ oei dơ̆ng đơ̆ng jăl jang, hơ nơ̆ng tơ plih ‘nao trong tơ gop nơ̆r, iŏk nơ̆r tơ gop đơ̆ng kon pơ lei, vei kơ jăp ki luơ̆t păng athei tơ jră sa pơ gơ̆m pơ jĭp trong jang tơ gŭm, đei iŏk yua grŭp lơ̆m pơ jing khôi luơ̆t.

Thuem: Tơ blơ̆