VOV4.Bahnar - Hơ nơ̆ng bơ̆ jang lơ̆m hop akŏm mă 9, ‘năr 14/3, Anih chĕp kơ̆l pơ gơ̆r Kuô̆k hô̆i mơ̆ng 2 Khul jang dăr lăng tơ roi truh dôm tơ drong iŏk đei blŭng a găh “Tơ drong bơ̆ jang kiơ̆ dôm tơ drong Tơ chơ̆t đơ̆ng Anih chĕp kơ̆l pơ gơ̆r Kuô̆k hô̆i găh tơ drong hơ met ming anih jang hanh chĭnh tơ̆ apŭng, xăh” păng “Bơ̆ jang kiơ̆ luơ̆t găh sơng kon pơ lei păng sek tơ lang tơ drong tơ kêng”. 3 sơ năm âu ki, lơ̆m tĕh đak tơ jur đei 3.437 anih jang tơ̆ xăh păng 429 anih jang tơ̆ apŭng; tơ jur đei 706 ‘nu kăn ƀô̆, bơ ngai jang kơ tĕh đak tơ̆ apŭng, 9.694 ‘nu kăn ƀô̆, bơ ngai jang kơ tĕh đak tơ̆ xăh păng 8.448 ‘nu bơ ngai jang pơ gia tơ̆ xăh.

Đơ̆ng 2019 - 2021 ‘mơ ‘met đei hlŏh 2 rơ bâu ti jên tơ lĕch jang, kiơ̆ đơ̆ng nŏh đei dơ̆ng kon jên vă jang atŏk tơ iung mŭk drăm tơ pôl, bơ̆ jang sut pơ đĭ pơ ngot, tơ jur tơ nuh hin, pơ jing tơ ring tơ rang ‘nao, tơ gop jang ‘lơ̆ng dôm trong jang vei sơ đơ̆ng tơ drong arih xa tơ pôl, pơm hơ tŏk tơ drong arih xa ăn kon pơ lei. Tơ drong jang kiơ̆ luơ̆t găh sơng kon pơ lei păng sek tơ lang tơ drong tơ kêng ăn ƀôh kơ sô̆ bơ ngai năm tơ̆ anih jang kơ tĕh đak vă tơ kêng, tơ hlâu roi tŏk, kơ sô̆ khul bơ ngai năm tơ kêng hơ dai roi tŏk; kơ sô̆ tơ drong glăi găh hơ năp sek tơ lang đơ̆ng anih jang tĕh đak jur.

Dơ̆ng: Tơ blơ̆