Tơdrong gĭt kăl đơ̆ng hop akŏm âu ‘nŏh jĭ hơlen năng tơdrong hơmet păng tơgop nơ̆r ăn dôm tơdrong vă pơma nuh lơ̆m hop akŏm ưh ê ‘măng mă 2, Kuô̆k hô̆i jăl 15 păng tơgop nơ̆r găh Trong jang atŭm kơ tĕh đak đơ̆ng 2021-2030, trong vă jang truh sơnăm 2050.

Kiơ̆ tơdrong hơgăt đơ̆ng Luơ̆t tơproh trong jang sơnăm 2017, Trong jang atŭm kơ tĕh đak ‘nŏh jĭ tơdrong tơproh trong jang gĭt kăl kơ tĕh đak, vă bơ̆ jang đunh đai kiơ̆ đơ̆ng chĕng hơmet tơring păng tơguăt tơring lơ̆m tĕh đak, đei hloi tơ̆ kông, dôm achon đak dơsĭ, tơring đak dơsĭ păng rơvơ̆ng plĕnh; tơring kơdrâm păng tơring tơrang; anih jang, trong nơnăm; iŏk yoa tơmam drăm păng vei lăng cham char; tang găn sar bar, tơjră hăm tŏ ‘mi kial tơplih, vei sơđơ̆ng tĕh đak păng mât jang hơdoi hăm apŭng plenh tĕh.

Lơ̆m năr ‘nâu mơ̆n, Anih chĕp kơ̆l pơgơ̆r Kuô̆k hô̆i tơgop nơ̆r ăn Luơ̆t khăm, hơmet jĭ (oei chih hơmet) păng pơtôch, hơlen năng tơdrong jang kiơ̆ Tơdrong tơchơ̆t 30, ‘măng hop akŏm mă mônh, Kuô̆k hô̆i jăl 15, tơlĕch 1,2 tơdrong tơgŭm gĭt kăl ăn tơdrong jang pơgang.