VOV4.Bahnar - Kơ sơ̆ 13/1, Anih jang Đảng Grŭp anih tĕch mơ dro kơ Trung ương pơ gơ̆r pơ tôch tơ drong jang sơ năm 2021 păng tơ lĕch tơ drong jang sơ năm 2022. Sơ năm 2021, Đảng ƀô̆ Grŭp anih tĕch mơ dro kơ Trung ương hơ nơ̆ng chĕp kơ̆l pơ gơ̆r dôm anih jang bơ̆ jang ‘lơ̆ng tơ drong tơ iung pơ jing Đảng hai, atŏk tơ iung tơ drong jang xa, tĕch mơ dro hai. Kiơ̆ kơ sô̆ chih jô̆, akŏm đĭ đăng iŏk yoa đơ̆ng dôm grŭp jang tih, công ty tơm lơ̆m Grŭp pơ hlom vă jê̆ 1,55 triu ti hlak jên, lơ hlŏh 43,5% pơ têng hăm nơ̆r hơ găt păng tŏk lơ ƀiơ̆ pơ têng hăm sơ năm 2020.

Jơ bơ̆ jang lơ̆m hop akŏm

Pơ ma lơ̆m hop akŏm, Kơ dră chĕp kơ̆l Anih vei lăng mŭk drăm Trung ương Trần Tuấn Anh athei, truh âu kơnh anih jang Đảng Grŭp anih tĕch mơ dro kơ Trung ương hơ nơ̆ng tưk hơ tŏk păng jang ‘lơ̆ng hlŏh dơ̆ng tơ drong tơ iung pơ jing, hơ met ming Đảng; Hơ nơ̆ng tơ plih ‘nao, pơm hơ tŏk tơ drong đei yoa mưh bơ̆ jang păng kơ sư̆k pơ jei đơ̆ng anih tĕch mơ dro; vei lăng ‘lơ̆ng tơ drong đei yoa, tơ drong jang ăn kăn ƀô̆, bơ ngai jang.

Dơ̆ng: Tơ blơ̆