Hăm hơnăn “Tơplih ‘nao mă brĕ trong jang đơ̆ng Đoàn”, Khei druh dăm tơlĕch 12 tơdrong hơgăt tơm, akŏm găh pơtho pơhrăm chinh trĭ, tơplih hăm kơmăy sô̆, vei lăng sơđơ̆ng tơdrong arih xa tơpôl păng tơgŭm ăn druh dăm iung jang xa.

Ƀlep ƀât ‘măng mă âu, Anih jang đoan dêh char tơlĕch tơdrong thi trư̆k tuyê̆n chă hơlen năng tơdrong Tơchơ̆t đơ̆ng Hop akŏm Đảng păng Hop akŏm Đoàn jơ̆p tơring; jang kiơ̆ Têt pơtăm ‘long; pơjao tơdrong jang đơ̆ng druh dăm pơgơ̆r jang păng hơpăh tơmam ăn hŏk tro, linh tơ̆ Kơđông linh vei lăng ‘măng jang sơlam lơ̆m Tơnŏk Vũng Rô. Đơ̆ng rŏng kơ lêh tơlĕch, dôm khul grŭp vang pơtăm ‘long, vei rơgŏh cham char, man sân păh ƀŏng lŏng păng et hơtŏk tơmât yoa lơ anih pơih wifi ưh iŏk jên. Akŏm đĭ đăng tơdrong jang hlŏh 200 triu hlak jên.