‘Năr 20/10, Anih jang Khoa hŏk Ki thuơ̆t choh jang sa bri ‘long Tây Nguyên (tơ̆ pơlei tơm Buôn Ma Thuột, dêh char Dak Lak)  pơgơ̆r Tơbăt 25 sơnăm pơjing păng sơng iŏk Mê đai bơ̆jang dơ̆ng mă mônh. Dôm sơnăm âu ki, Anih jang Khoa hŏk Ki thuơ̆t choh jang sa bri ‘long Tây Nguyên hlôi rơih pơm jơnei 15 hơdrĕch cheh phe vối plei lơ, lơ hơdrĕch tiu, ƀơ, ca cao ‘lơ̆ng vă tơmơ̆t lơ̆m pơm tơlĕch.

Anih jang Khoa hŏk ki thuơ̆t choh jang sa bri ‘long Tây Nguyên sơng iŏk Mê đai bơ̆ jang dơ̆ng mă mônh

‘Nâu jĭ dôm hơdrĕch tơm lơ̆m dôm tơdrong jang pơtăm ming cheh phe, tơplih ‘long pơtăm tơ̆ dôm dêh char Tây Nguyên. Hơdai hăm ‘noh, anih jang kŭm năm hơdrol tơchĕng hơlen tơdrong choh pơtăm bri ‘long tơ̆ Tây Nguyên, pơm tơdrong ‘lơ̆ng vă dôm dêh char lơ̆m tơring jang kiơ̆ dôm trong chĕng hơmet teh hơtŏk tơiung choh jang sa- bri ‘long. Anih jang tŭn pran jang hơdai apŭng plĕnh teh, lơ̆m noh đei jang hơdai hăm Cuba găh hơtŏk tơiung cheh phe kơjăp; Jang hơdai hăm Nestle lơ̆m hơdrin tơgŭm hơdrĕch cheh phe ăn kon pơlei jang chŭn mir.