VOV4.Bahnar - ‘Năr 1/3, tơ̆ Hnam Kuô̆k hô̆i, Anih jang Tư phap kơ Kuô̆k hô̆i hop akŏm atŭm ‘măng mă 4, tơ gop nơ̆r găh tơ drong hơ găt trong pơm hla ar ăn Anih Sek tơ lang kon pơ lei hơ len, tơ chơ̆t tơ drong ăn bơ ngai et ma túy đơ̆ng 12 sơ năm truh hơ la 18 sơ năm mât hơ met tơ̆ anih pơ gŏ hơ met hloi. Kiơ̆ tơ drong hơ găt đơ̆ng Luơ̆t tang găn ma túy ‘nŏh hơ năp tơ chơ̆t ăn bơ ngai et ma túy đơ̆ng 12 sơ năm truh hơ la kơ 18 sơ năm mât hơ met tơ̆ anih pơ gŏ hơ met et ma túy yoa Anih sek tơ lang kon pơ lei tơ̆ apŭng set hơ len, tơ chơ̆t. Mă lei, trong pơm hla ar oei tam mă chih hơ dăh.

Luơ̆t tang găn ma túy chih hơ dăh, Anih chĕp kơ̆l pơ gơ̆r Kuô̆k hô̆i chih tơ lĕch tơ drong hơ găt trong pơm hla ar ăn Anih sek tơ lang kon pơ lei set hơ len, tơ chơ̆t tơ drong ăn bơ ngai tôm 12 sơ năm truh hơ la kơ 18 sơ năm mât hơ met tơ̆ anih pơ gŏ hơ met. Hăm dôm tơ drong ‘nŏh, dôm bơ ngai tang măt akhan, tơ drong tơ lĕch Hla ar chih găh trong pơm hla ar ăn Anih sek tơ lang kon pơ lei set hơ len, tơ chơ̆t ăn bơ ngai et ma túy đơ̆ng 12 sơ năm truh hơ la kơ 18 sơ năm mât hơ met tơ̆ anih pơ gŏ hơ met ‘nŏh tôch kăl.

Dơ̆ng: Tơ blơ̆