VOV4.Bahnar  – Pơtoi kơ tơdrong hop akŏm mă 16, pơgê âu năr (11/10), Anih juăt jang Kuôk hô̆i tơgop nơ̆r lơ̆m dôm tơdrong tơbang đơ̆ng Khul Kơpal teh đak găh tơdrong pơm kiơ̆ pơkăp hơtŏk mŭk drăm – tơpôl xơnăm 2022 păng pơkăp jên mong kơ teh đak. Xơnăm 2022, tơdrong pơm kiơ̆ pơkăp hơtŏk mŭk drăm – tơpôl gô đei jơnei păng yak hloh 14 lơ̆m 15 tơchơ̆t pơtêng hăm pơkăp Kuôk hô̆i pơjao, lơ̆m noh hơtŏk mŭk drăm đei pơhlom 8%, yak hloh tơchơ̆t 6 - 6,5%, pơm trong kăp gĭt ăn dôm xơnăm pơtoi đơ̆ng rŏng kơ noh hơtŏk mŭk drăm pơkăp jang kơ 5 xơnăm 2021 - 2025. Lơ̆m xơnăm 2023, tơroi găh tơpôl apŭng plenh teh, lơ̆m teh đak đei trong hiôk păng tơnap tap lơ hloh, mă hăt noh hăm tơdrong pơgơ̆r jang mŭk drăm dơnơm. Kơyuơ noh, khul kơpal teh đak pơkăp pơtoi vei xơđơ̆ng hăm tơdrong jang mŭk drăm dơnơm, tang găn tơdrong huach kư̆ kă, drŭt hơtŏk tơ iung, vei xơđơ̆ng dôm pơkăp jang mŭk drăm. Khŏm mă hơtŏk tenh tơdrong pơm kiơ̆ pơkăp hơmet pơ 'lơ̆ng păng hơtŏk mŭk drăm – tơpôl, 3 Tơdrong jang kơ teh đak: Pơjing tơring pơxĕl 'nao, hơtŏk mŭk drăm – tơpôl tơring kon pơlei kon kông păng groi kông păng xut lê̆ pơngot tơjur hin dơnuh kơjăp xơđơ̆ng.

VOV/ Lan tơblơ̆ nơ̆r