VOV4.Bahnar - Pơ gê 20-9, Khul jang đơ̆ng Anih pơ gơ̆r jang kơ Trung ương găh tang găn xa pơ jĭp, pơm glăi yoa Đại tướng Tô Lâm, Kơ dră jang lơ̆m Anih tơm Chinh trĭ, Kơ dră tơm vei lăng Công an, Phŏ Kơ dră Anih pơ gơ̆r jang kơ Trung ương găh tang găn xa pơ jĭp, pơm glăi chĕp kơ̆l, đei jơ bơ̆ jang hăm Anih jang đảng dêh char Dak Lak găh tơ drong roi tơ băt dôm hla ar chih dăr hơ len năng đơ̆ng Khul dăr hơ len kơ sô̆ 4 tơ̆ Khul kơ dră chĕp kơ̆l Đảng dêh char Dak Lak. 

Ƀok Nguyễn Xuân Trường, Kơ dră Anih vei lăng tơ̆ tơ ring kơ Anih jang Nội chính Trung ương tang măt ăn Khul jang roi tơ băt hla ar chih dăr hơ len năng

Kiơ̆ hla ar chih tơ roi tơ drong dăr hơ len đơ̆ng khul, rim sơ năm, Khul kơ dră chĕp kơ̆l Đảng dêh char Dak Lak hơ nơ̆ng tơ lĕch păng bơ̆ jang kiơ̆ trong dăr hơ len, tơ kêng tơ hlâu truh dôm tơ drong pơm glăi, tơ drong xa pơ jĭp, truh mŭk drăm, tơ drong yoch đei tơ pôl tôch tơ rĕk păng lăng năng dơ̆ng tơ drong dăr hơ len găh mŭk drăm, tơ pôl tơ̆ 1,2 tơ ring, anih jang, tơ mât hơ dai dôm tơ drong ‘nâu mưh pơ gơ̆r bơ̆ jang kiơ̆ dôm trong jang tih đơ̆ng Đảng păng khôi luơ̆t tĕh đak hăm tơ drong tang găn xa pơ jĭp, pơm glăi.

Pơ ma pơ tôch jơ bơ̆ jang, Đại tướng Tô Lâm, Kơ dră jang lơ̆m Anih tơm Chinh trĭ, Kơ dră tơm vei lăng Công an, Phŏ Kơ dră Anih pơ gơ̆r jang kơ Trung ương găh tang găn xa pơ jĭp, pơm glăi athei: Khul kơ dră chĕp kơ̆l Đảng dêh char Dak Lak hơ nơ̆ng pơ tho ăn rim anih jang đảng, khul kơ dră tơ ring, dôm đảng ƀô̆, chi ƀô̆ găh sư hlôh vao kơ jăp păng bơ̆ jang mă ‘lơ̆ng dôm đon tơ chĕng, trong jang, tơ drong hơ găt đơ̆ng Đảng păng khôi luơ̆t tĕh đak, kŭm nhen đơ̆ng Anih jang đảng dêh char păng Khul kơ dră chĕp kơ̆l Đảng dêh char, Dơ nŏ anih vei lăng kon pơ lei dêh char găh tơ drong tang găn xa pơ jip, pơm glăi.

Đại tướng Tô Lâm, Kơ dră jang lơ̆m Anih tơm Chinh trĭ, Kơ dră tơm vei lăng Công an, Phŏ Kơ dră Anih pơ gơ̆r jang kơ Trung ương găh tang găn xa pơ jĭp, pơm glăi pơ ma pơ tôch hop akŏm

Hơ tŏk tơ drong dăr lăng kŭm nhen hơ len năng kơ dih đơ̆ng Khul kơ dră chĕp kơ̆l đảng dêh char, rim anih jang đảng, khul grŭp jang đảng hăm tơ drong tang găn xa pơ jĭp, pơm glăi pơ ma atŭm, tơ drong sơng iŏk, sek tơ lang nơ̆r tơ kêng găh tơ drong yoch păng nơ̆r athei tơ kêng tơ drong pơm glăi pơ ma adrô̆. Hơ tŏk tơ dỏng ‘lơ̆ng mưh dăr hơ len, hơ len năng kơ dih, tơ lĕch nơ̆r athei hơ met pơ ‘lơ̆ng, sek tơ lang tơ păt dôm tơ drong tam mă ‘lơ̆ng hơ iă.

Atŭm hăm ‘nŏh, Khul kơ dră chĕp kơ̆l Đảng dêh char Dak Lak kơ chăng chih tơ lĕch trong hơ met pơ ‘lơ̆ng dôm tơ drong tam mă ‘lơ̆ng hơ iă păng jang kiơ̆ tôm nơ̆r athei đei chih lơ̆m Hla ar tơ roi đơ̆ng Khul dăr hơ len năng kơ sô̆ 4, tơ roi ăn Anih chĕp kơ̆l pơ gơ̆r kơ Trung ương găh tơ drong tang găn xa pơ jĭp, pơm glăi kiơ̆ tơ drong hơ găt. Hơ drô̆ tơ̆ dêh char Dak Lak, Khul kơ dră chĕp kơ̆l Đảng dêh char athei tơ rĕk hlŏh dơ̆ng truh tơ drong chĕp kơ̆l pơ gơ̆r, pơ tho ăn dôm anih jang kơ pal chă ƀôh hrôih dôm tơ drong kơ tơ̆ng ang găh tơ drong pơm glăi mưh vei lăng tĕh, tơ mam drăm păng vei lăng bri.

Dơ̆ng: Tơ blơ̆