Pơgê (24/11), Khul dăr lăng kơsô̆ 5 đơ̆ng Anih pơgơ̆r pơtôch Tơdrong tơchơ̆t 23 kơ Khul Kơdră chĕp kơ̆l Trung ương Đảng jăl IX yoa Y Thanh Hà Niê Kđăm, Kơdră Anih vei lăng hơdrĕch kon kông kơ Kuô̆k hô̆i chĕp kơ̆l đei jơ bơ̆ jang hăm Khul kơdră chĕp kơ̆l đảng dêh char Dak Lak găh tơdrong jang kiơ̆ Tơdrong tơchơ̆t 23 “Tưk tơ iung jơhngâm pran đơ̆ng tơguăt hơdrĕch hơdrung yoa kon pơlei pơ drŏng, tĕh đak pran kơtang, tơpôl hơtŏ băl, kon pơlei pơm tơm gơ̆h hơgei” tơ̆ dêh char.

Tơ̆ jơ bơ̆ jang, Khul dăr lăng athei Khul kơdră chĕp kơ̆l đảng dêh char Dak Lak hơnơ̆ng chĕp kơ̆l pơgơ̆r, pơtho ăn dôm tơring bơ̆ jang ‘lơ̆ng, đei yoa trong jang “Kon pơlei băt, kon pơlei pơma nuh, kon pơlei bơ̆ jang, kon pơlei dăr lăng, kon pơlei xa yoa”. Rim khul tơpôl hơtŏk hơnăp jang tơm vă krao hơvơn kon pơlei, hơ nhăk jơhngâm pran đơ̆ng tơguăt đĭ đăng hơdrĕch hơdrung jing jơhngâm pran atŭm vă jang atŏk tơ iung mŭk drăm, tơpôl vei lăng sơđơ̆ng tĕh đak tơ̆ tơring.