Pơma tơ̆ hop akŏm, Tổng Bí thư tơroi hơdăh tơdrong tơm đơ̆ng ‘măng hơlen lăng vă hơlen lăng tôm tơdrong chĕp kơ̆l, pơgơ̆r tơchĕng hơlen, hŏk pơhrăm, vei kơjăp, roi tơbăt păng pơgơ̆r tơlĕch jang kiơ̆ tơdrong Tơchơ̆t Hop akŏm XIV kơ Đảng kŭm hăm rim tơdrong tơchơ̆t, athei đơ̆ng Anih tơm Chĭnh trĭ ƀơm truh. Kiơ̆ đơ̆ng hơlen lăng, khŭl bơ̆jang gô chă ƀôh dôm trong jang ‘nao, pơcheh hơgei, đei yua, hơdai hăm pơtôch dôm tơdrong hlôh vao hơiă lơ̆m kơplăh pơgơ̆r bơ̆jang kiơ̆ tơ̆ Đảng bộ pơlei tơm Hà Nội; hơlen lăng dôm tơdrong ‘lơ̆ng, tam mă ‘lơ̆ng đơ̆ng Khŭl chĕp kơ̆l pơgơ̆r Anih jang Đảng pơlei tơ̆ rim tơdrong đei hơlen lăng.

Tổng Bí thư Tô Lâm athei dôm bơngai jang lơ̆m khŭl hơlen lăng hơtŏk jơhngơ̆m đon jang tơnăp, pơm kiơ̆ tơpăt tơdrong klăih song jang đơ̆ng kơdră chĕp kơ̆l khŭl, kơchăng dăr hơlen, băt hơdăh, tơchĕng hơlen hô sơ, hla ar kăl ƀơm truh vă vei sơđơ̆ng ‘lơ̆ng, hrĕnh tơdrong hơlen lăng kiơ̆ trong tơlĕch ăn.