Tơ̆ jơ hop akŏm âu, Anih tơm Chĭn trĭ drơ̆ng tơbang Tơchơ̆t găh pơkăp jang, xơnong jang hơtŏk pơlei tơm Hồ Chí Minh hăm pơkăp truh xơnăm 2030 noh pơlei tơm pơm jang kiơ̆ trong 'nao gơh rơgei, jing dơnơm găh mŭk drăm sô̆, tơpôl sô̆, jing anih tơm mŭk drăm, jên hu, tĕch pơdro, khoa hŏk kŏng ngê̆, joh ayŏ hŏk pơhrăm kơ tơring Đông Nam Á, jang hadoi lơ̆m kơpal teh pran hloh.

Truh xơnăm 2045, jing anih tơm mŭk drăm, jên hu, jang tơnăp kơ tơring châu Á, jing anih truh 'lơ̆ng hơ iă lơ̆m kơpal teh, mŭk drăm, joh ayŏ hơtŏk kăp gĭt, pơ 'lơ̆ng găh tơdrong erih; jing tơring kơdrâ̆m hơtŏk tơ iung hơtŏ hăm dôm tơring kơdrâ̆m lơ̆m kơpal teh. Anih tơm Chĭn trĭ pơkăl pơlei tơm pơtoi chĕp vei tơdrong juăt jue kăch mạng, tơguăt tơguăl, jang hadoi kơjăp hăm dôm anih jang păng dôm tơring pơm jang đei jơnei Tơchơ̆t tơlĕch. Hơtŏk mŭk drăm pran, kơjăp kơtang, hơtŏk pơ-'lơ̆ng pơyua păng tơdrong tơgar jang lơ̆m kơpal teh; hơtŏk tơguăt rim tơring; hơtŏk pran tơdrong ming man drơ̆ng minh, vei xơđơ̆ng tơdrong jang tŏk minh hơyak adrol.