Tơ̆ jơ hôp trư̆k tuyê̆n hăm dôm dêh char Khánh Hòa, Gia Lai păng Đắk Lắk, Lâm Đồng, Tây Ninh, Thủ tướng Phạm Minh Chính pơma hơdăh, tơdrong ‘mi tih đak lơ̆p păng bơ̆ jang hơmet pơ ‘lơ̆ng hiong răm đơ̆ng ‘mi tih đak lơ̆p đei Anih tơm Chinh trĭ, ƀok Tổng Bí thư pơtrho tôch hơlen, athei dôm kơdră jang lơ̆m Anih tơm Chinh trĭ, kơdră chĕp kơ̆l dôm tơring năm ngôi, pơlung, tơƀôh trong hơmet pơ ‘lơ̆ng hiong răm.

Bơ̆ jang kiơ̆ tơdrong pơjao đơ̆ng Anih tơm Chinh trĭ, 4 khul jang đơ̆ng đe Kơdră chĕp kơ̆l Đảng, Teh đak, Khul kơdră teh đak jur truh tơ̆ dôm tơring, lơ̆m noh, Kơdră chĕp kơ̆l Ban Bí thư Trần Cẩm Tú năm tơ̆ Khánh Hòa, Phó Thủ tướng Nguyễn Hòa Bình truh tơ̆ Đắk Lắk, Kơdră tơm vei lăng khul linh teh đak Phan Văn Giang truh tơ̆ Gia Lai, Kơdră Anih Trung ương Mặt trận Tổ quốc Việt Nam Bùi Thị Minh Hoài truh tơ̆ Lâm Đồng.

Truh hơlen năng, pơgơ̆r bơ̆ jang hơmet pơ ‘lơ̆ng hiong răm đơ̆ng ‘mi tih, đak lơ̆p tơ̆ dêh char Khánh Hòa, Kơdră chĕp kơ̆l Ban Bí thư Trần Cẩm Tú athei dêh char Khánh Hòa hơnơ̆ng bơ̆ jang mă ‘lơ̆ng kiơ̆ nơ̆r pơtho đơ̆ng Anih tơm Chinh trĭ, Ban Bí thư, Tổng Bí thư Tô Lâm; đơ̆ng Khul kơdră teh đak păng Thủ tướng teh đak; athei dôm anih chĕp kơl đảng, khul kơdră tơring năm ngôi, jet gia pơma nuh, pơlung unh hnam đei bơngai lôch, hiong hơkâu; vei lăng ‘lơ̆ng bơngai rơka: “Mong akŏm tôch ai tơmam drăm jên hu, tơmam yoa kăl, adrin bơ̆ jang tôch pơneh vă dŏng tơgŭm ăn kon pơlei oei ưh gơ̆h yak vih vât tơ̆ tơring đak lơ̆p jrŭ. Khul kơdră tơring athei pơm ‘lơ̆ng ăn anih oei xa pơgia, pơtruh tơtom, tôm tĕch dôm tơmam yoa kăl ăn kon pơlei; vei lăng mă ‘lơ̆ng bơngai kră, đe hơioh, drŏ kăn hơnăp, bơngai pơmat tat ƀônh đei tơdrong răm; ưh ăn đei tơdrong ưh măh hnam trưng, lăm hŏk ăn kon mon, ưh đei anih khăm hơmet jĭ ăn kon pơlei”.

Ƀlep ƀât ‘măng mă âu, tang măt ăn kơdră chĕp kơ̆l Đảng, Teh đak, Kơdră chĕp kơ̆l Ban Bí thư Trần Cẩm Tú pơjao jên tơgŭm 20 ti ăn Đảng ƀô̆, khul kơdră tơring păng kon pơlei dêh char Khánh Hòa.

Đơ̆ng rŏng kơ gre păr păr jur tơ̆ cham gre păr Cam Ranh (dêh char Khánh Hoà) lơ̆m kơmăng, Phó Thủ tướng Nguyễn Hoà Bình hlôi năm truh tơ̆ tơring đak lơ̆p dêh hlŏh tơ̆ phường Đông Hoà, dêh char Đắk Lắk (apŭng Đông Hoà, dêh char Phú Yên so). Phó Thủ tướng tơƀôh đon mơnat hăm dôm tơdrong hiong răm, ơh sơ ‘ngon đơ̆ng kon pơlei athei pŭ păng pơma hơdăh, Đảng, Teh đak ưh đei lai yơ hŭt hơchăng kon pơlei hơdrô̆. Rim tơdrong tơgŭm gô đei pơtruh hrĕnh păng đei yoa hlŏh: “Kơplăh ƀât pơmat tat dêh hlŏh âu, tơdrong kăl hlŏh jĭ kon bơngai, kiơ̆ nơ̆r pơtho chông ba trong đơ̆ng Ƀô đô̆i, Công an lĕch truh tơ̆ âu ‘nŏh gĭt kăl dêh, tơmam, hnam oei păk pơchăh, hiong răm đĭ ‘nŏh gô đơ̆ng rŏng tơchĕng dơ̆ng, Đảng, Teh đak gô tơgŭm thim dơ̆ng. Oei kư̆ nŏng kơ ‘mêm hmach kơ tơmam tơ̆ noh ‘nŏh gô jing đei tơdrong tôch krê hơmơt. Bơngai ‘nŏh kăl hlŏh, đe kon mon lĕch truh tơ̆ âu ‘nŏh sơđơ̆ng ‘lơ̆ng, hơiă dêh bơih. Dang ei tơdrong athei tih hlŏh jĭ athei dŏng bơngai ‘mơ̆i”.

Phó Thủ tướng teh đak kĭ tơdrong Tơchơ̆t tơgŭm hăt hot ƀơk kơ ti hlak jên ăn 4 dêh char Khánh Hòa, Lâm Đồng, Gia Lai păng Đắk Lắk. Anih tơm vei lăng khul linh teh đak athei dang 45 rơbâu ‘nu kăn ƀô̆, linh kŭm hăm rơbâu tŏ gre; chơ chuĕn, ƀơk kơhrĕng tân tơmam, ăn gre vơvêl chơ hơtat tơmam tơgŭm ăn kon pơlei tơ̆ tơring đak lơ̆p. Khul linh công an krao akŏm kơ hrĕng ‘nu kăn ƀô̆, linh păng khul grŭp vang bơ̆ jang vei lăng sơđơ̆ng tơ̆ tơring, iŏk yoa gre, kơmăy kơmŏk vă tơjră, hơmet pơ ‘lơ̆ng hiong răm đơ̆ng ‘mi tih đak lơ̆p. Anih tơm vei lăng choh jang xa păng cham char krao hơvơn rim anih jang lơ̆m apŭng plenh teh teh vang tơgŭm tơmam xa, đak toh păng đak nhă ăn kon pơlei tơ̆ tơring đak lơ̆p găh dôm dêh char Gia Lai păng Đắk Lắk; atŭm hăm ‘nŏh tơgŭm 1.500 kơthŭng mi tôm ăn Đắk Lắk. Anih tơm vei lăng jên hu tơlĕch ƀơk 4.000 tân phe ăn dôm dêh char Gia Lai, Khánh Hòa. Anih tơm vei lăng jang pơgang mong akŏm, iŏk ƀơk 6 tân pơgang hóa chất păng 150.000 găr pơgang hlŏng hơmet đak; 3.000 kơdung pơgang ăn unh hnam tơ̆ tơring đak lơ̆p.