VOV4.Bahnar - Pơ gê hei (14/10) tơ̆ Hà Nội, Anih tơm Chĭnh trĭ, Ban Bí thư pơ gơ̆r hop akŏm vei kơ jăp păng tơ lĕch jang kiơ̆ tơ drong tơ chơ̆t đơ̆ng Anih tơm Chĭnh trĭ găh trong vă jang hơ tŏk tơ iung tơ ring mŭk drăm tơ pôl păng vei sơ đơ̆ng tơ ring Tây Nguyên truh sơ năm 2030 lăng truh sơ năm 2045. Tổng Bí thư Nguyễn Phú Trọng pơ gơ̆r păng đei ƀai iung pơ ma pơ gơ̆r gĭt kăl tơ̆ hop akŏm.

Anih tơm Chĭnh trĭ, Ban Bi thư pơ gơ̆r hop akŏm hơ tŏk tơ iung mŭk drăm tơ pôl, vei sơ đơ̆ng tơ ring tŏk bŏk groi kông găh tu truh sơ năm 2030, trong vă jang truh sơ năm 2045

‘Nao âu, truh akŏm pơ gơ̆r păng iung pơ ma tơ̆ Hop akŏm pơ tôch jang kiơ̆ Tơ drong tơ chơ̆t kơ sô̆ 10 păng tơ chơ̆t kơ sô̆ 12 đơ̆ng anih tơm Chĭnh trĭ găh hơ tŏk tơ iung mŭk drăm - tơ pôl păng vei sơ đơ̆ng tơ ring Tây Nguyên, Thủ tướng Phạm Minh Chính hlôi pơ ma hơ dăh 1,2 ƀai hŏk hlôh vao gĭt kăl nhen kăl kơ hlôh vao ƀlep păng tôm găh hơ năp jang, anih dơ̆ng păng tơ drong gĭt kăl đơ̆ng tơ ring hăm lơ̆m teh đak tơ̆ đĭ đăng rim tơ ring, rim anih jang; tơ roi rơ đăh hơ tŏk tơ iung tơ ring Tây Nguyên athei akŏm păng jang hơ dai hơ met pơ ‘lơ̆ng hrơ̆ch 1 ‘măng pơ đĭ găh chĭnh trĭ, đon tơ chĕng, mŭk drăm, tơ pôl, cham char, vei lăng sơ đơ̆ng teh đak; tơ klep hăm hơ tŏk tơ iung mŭk drăm hăm vei lăng hơ met pơ ‘lơ̆ng dôm tơ drong tơ pôl, trong jang tơ gŭm kon kông, lui khop; tơ iung đon chhôk ‘nă, tơ plih tơ drong kăp gĭt jơ hnơr arih, joh ayŏ, joăt joe kach mang, đon hơ drin, hơ pơi ‘meh yak tŏk, hơ drin đơ̆ng kơ dih, 1 jơ hngơ̆m đon jang tơ drong ‘lơ̆ng hơ tŏk tơ iung; athei  đei trong jang tơ gŭm sơng iŏk jên, tơ mam hơ tŏk tơ iung, mă loi ‘noh jĭ jang hơ dai đơ̆ng teh đak, kơ dih, jên, tơ mam đơ̆ng tơ pôl păng tơ mơ̆t jên jang teh đak đe.

VOV/Thuem tơ blơ̆