VOV4.Bahnar - Anih tơm Nội vụ ‘nao athei tơ mơ̆t hơ dai lơ anih jang kơ Anih tơm vei lăng găh tơ drong jang pơ gang, Anih tơm vei lăng găh choh jang sa păng hơ tŏk tơ iung tơ ring tơ rang. Anih tơm Nội vụ drơ̆ng nơ̆r hăm apĭnh đơ̆ng Anih tơm vei lăng găh choh jang sa păng hơ tŏk tơ iung tơ ring tơ rang găh tơ drong hơ met tôm khŭl jang ‘noh đei akŏp kơ sô̆ 27 anih jang tơm, lơ̆m noh đei 21 khŭl jang hành chính păng 6 anih jang tơ drong jang teh đak. Hăm Anih tơm vei lăng găh tơ drong jang pơ gang, vei đêl so 12 anih jang đei tơ drong jang vei lăng teh đak; hơ dai, pơ gơ̆r dơ̆ng 8 anih jang. Hơ drol ‘noh, blŭng khei 3 sơ năm ‘nâu, Thủ tướng teh đak athei rim anih tơm, anih jang, tơ ring pơ jing hla ar chih ming tơ chơ̆t tơ drong jang, hơ năp jang, tơ drong gơh jang păng hơ met ming khŭl jang kơ anih jang kơ dih gơ̆ih ăn Anih tơm Nội vụ, Anih tơm Tư pháp hơ len lăng, pơ truh ăn Khŭl kơ dră teh đak set hơ len, tơ chơ̆t lơ̆m khei 3/2022. Mă lei, Kiơ̆ kơ Phŏ Kơ dră Anih tơm Nội vụ Nguyễn Duy Thăng, tơ drong proh hơ met khŭl jang, bơ ngai jang ‘noh jĭ tơ drong mơ mat kăl kơ đei jơ năr set hơ len mă hơ đăl kơ na gô pơ truh ăn Khŭl kơ dră teh đak set hơ len tơ̆ hơ năp kơnh.

Thuem: Tơ blơ̆