VOV4.Bahnar - Tơ dra adrol trong jang tŏk GDP tôch mơ mat, mă loi lơ̆m jăl khei mă 4, ƀât mă rim tơ drong lơ̆m apŭng plenh tĕh oei tôch krê hơ mơt. Tơ̆ hơ năp tơ drong ‘nâu, Anih tơm tơ lĕch nơ̆r sơ kơ̆t tơ mât jên jang tơ lĕch hiă 2 trong: Tơ dăh jang tŏk kơ đeh yoa tơ ƀâp lơ mơ mat tat ‘nŏh lơ̆m sơ năm 2022, rŏ năng GDP tŏk 7,5%. Oei tơ dăh rim tơ drong oei đei nhen hrei ‘nâu, ưh đei tơ drong kiơ ƀơm kơ nê̆ tih hăm mŭk drăm tĕh đak bơ̆n đơ̆ng ‘ngoăih ‘nŏh tơ dra adrol GDP gô tŏk dang 8%. 

Găh tơ drong hơ mĕng mŭk drăm Việt Nam sơ năm 2023, Anih tơm tơ lĕch nơ̆r sơ kơ̆t, tơ mât jên jang akhan, ƀât mă oei đei hloi tơ drong kơ hret, tơ drong ‘lơ̆ng păng mơ mat hrâu hrĕch băl, mă lei tơ drong mơ mat tat lơ ƀiơ̆. Tơ drong kơ jă tơ mam tŏk păng tơ drong jang tŏk mŭk drăm lơ̆m apŭng plenh tĕh sơ năm 2023 hơ nat vă gơ̆h tơ dra hơ drol, Việt Nam kăl đei trong vei ‘lơ̆ng rim tơ drong ‘nŏh hơ mŏ tơ drong jang tŏk gơ̆h sơ đơ̆ng ‘lơ̆ng, tơ dăh ưh vei lăng ‘lơ̆ng ‘nŏh tôch mơ mat vă gơ̆h tơ dra hơ drol.

Pơ ma găh tơ drong tơ lĕch jên jang kơ tĕh đak, Phŏ Kơ dră chĕp kơ̆l Anih tơm tơ lĕch nơ̆r sơ kơ̆t, tơ mât jên jang ăn tơ băt, ‘nao jang đei 46,7% pơ têng hăm kơ sô̆ hơ găt đơ̆ng Thủ tướng pơ jao. Mă đơ̆ng tŏ sĕt ƀiơ̆ pơ têng hăm khei âu sơ năm sơ̆ ră, mă lei tơ lĕch tơ pă lơ ƀiơ̆ kơ sơ năm vă jê̆ 35.000 ti hlak jên. Tơ drong tơm ‘nŏh yoa kơ sô̆ jên tơ mât jang kơ tĕh đak sơ năm 2022 lơ ƀiơ̆ kơ sơ năm 2021.

VOV/Dơ̆ng tơ blơ̆