VOV4.Bahnar - Anih tơm vei lăng găh jang pơ gang ‘nao đei tơ lĕch tơ gop nơ̆r ăn trong jang pơ gơ̆r pơ long tốt nghiệp jăl 3 sơ năm 2022, lơ̆m noh tơ roi truh tơ drong dôm hŏk tro đei ƀơm ưh kơ ‘lơ̆ng yua đơ̆ng jĭ COVID-19. Lơ̆m noh, hăm hŏk tro F0, tơ dăh tŏk bŏk đei răp hơ len, hơ met ƀĭch tơ̆ hnam pơ gang lơ̆m khei ‘năr pơ gơ̆r pơ long, gô đei asong ăn hla ar tốt nghiệp jăl 3. Mưh hŏk tro đei ‘meh vă vang pơ long tốt nghiệp jăl 3 gô đei pơ gơ̆r pơ long lơ̆m ‘măng pơ long nai. Hŏk tro ‘noh F0 tŏk bŏk đei hơ len lăng, ăn oei hơ drô̆ tơ̆ hnam lơ̆m khei ‘năr pơ gơ̆r pơ long kŭm đei set asong ăn tốt nghiệp jăl 3. Mưh hŏk tro đei ‘meh vă vang pơ long, athei đei hla ar apĭnh vang pơ long đơ̆ng hŏk tro păng kĭ hơ len lăng drơ̆ng ăn đơ̆ng mĕ ƀă hŏk tro dăh mă bơ ngai vei rong, lơ̆m noh đei chih hŏk tro pơ kăp pơm kiơ̆ tơ păt dôm trong tang găn jĭ COVID-19. Mă hơ dăh, pơ gơ̆r lăm pơ long tốt nghiệp jăl 3 hơ drô̆ ăn hŏk tro F0 răp hơ len, ăn oei hơ drô̆ tơ̆ hnam tơ dăh đei ‘meh vă. Hŏk tro găh ngôi tơ jê̆ (F1) gơh vang pơ long hơ dai hăm dôm hŏk tro ưh kơ đei ƀơm ưh kơ ‘lơ̆ng yua đơ̆ng jĭ COVID-19. Hŏk tro găh bơ ngai jĭ đei jâu jĭ gơh vang pơ long. Khŭl vei lăng pơ long pơ gơ̆r ăn hŏk tro găh bơ ngai ji đei jâu jĭ pơ long tơ̆ dôm anih pơ long hơ drô̆ pơm lăp hăm ‘meh vă găh tang găn jĭ COVID-19. 

Thuem: Tơ blơ̆