VOV4.Bahnar - Pơ gê ‘năr 1/7, Khŭl hơ len lăng kơ sô̆ 4, Anih tơm vei lăng găh pơ tho pơ hrăm, hlôi năm hơ len lăng tơ drong jang hơ met ăn ‘măng pơ long tôt ngiêp jăl 3 sơ năm 2022 tơ̆ dêh char Dak Nông. ‘Măng pơ long tôt ngiêp jăl 3 sơ năm 2022, lơ̆m dêh char Dak Nông đei 6.881 ‘nu hŏk tro vang chih măt pơ long, lơ̆m noh đei 6.593 ‘nu hŏk tro jăl 3 păng 288 hŏk tro pơ tho pơ hrăm hơ nơ̆ng.

Dêh char hơ met 19 hơ nih pơ long hăm 303 lăm pơ long, tŏk dơ̆ng 1 hơ nih pơ long pơ têng hăm ‘măng pơ long sơ năm hơ drol. Truh dang ei, đĭ đăng dôm hơ nih pơ long lơ̆m dêh char Dak Nông hlôi hơ met tôm trong jang pơ gơ̆r ‘măng pơ long kiơ̆ tơ drong hơ găt đơ̆ng Anih tơm vei lăng găh pơ tho pơ hrăm. Đơ̆ng rŏng hơ len lăng yan âu tơ̆ 1,2 hơ nih pơ long, Khŭl hơ len lăng kơ Anih tơm vei lăng găh pơ tho pơ hrăm tơ tă 1, 2 tơ drong hơ mơt kơ đei ƀôh nhen: hŏk tro ưh kơ pơ rơ̆ng chĕp điên thoăi lơ̆m lăm pơ long; hŏk tro, bơ ngai lăng pơ long jĭ covid-19… Yua thoi noh, hơ drol kơ hŏk tro mơ̆t lơ̆m lăm pơ long, dêh char kăl athei dăr lăng mă hơ len dôm tơ drong hơ met ăn, kơ chăng hơ met pơ ‘lơ̆ng tơ drong đei ƀôh, vei sơ đơ̆ng ‘lơ̆ng ‘măng pơ long.

Thuem: Tơ blơ̆