VOV4.Bahnar - Kơ sơ̆ ‘năr 6/2 tơ̆ Trung đoàn 916, Sư đoàn gre păr 371, Khŭl linh gre păr, hloh 5.000 tơ nơm ‘long hlôi đei pơ tăm tơ̆ Lêh tơ lĕch jang pơ tăm ‘long ling lang ƀlŏk bơ nê kơ ƀok Hồ, jang kiơ̆ tơ drong jang pơ tăm 1 ti tơ nơm ‘long - yua kơ 1 Việt Nam rơ goh ‘lơ̆ng sơ năm 2022 yua đơ̆ng Anih tơm vei lăng Khŭl linh pơ gơ̆r. Tơ lĕch jang Têt pơ tăm ‘long, Đại tướng Phan Văn Giang, Kơ dră Anih tơm vei lăng khŭl linh tơ roi rơ đăh sơ năm 2022, đĭ đăng linh hơ drin pơ tăm 3,3 triệu tơ nơm ‘long pơm yơ̆p păng hloh 2.400 ha bri. Vă jang đang tơ drong hơ găt, Kơ dră Anih tơm vei lăng khŭl linh Phan Văn Giang athei rim anih jang hơ nơ̆ng jang ‘lơ̆ng hloh dơ̆ng tơ drong jang tơ roi tơ băt, pơ tho, hơ tŏk ‘lơ̆ng đon hlôh vao lơ̆m đĭ đăng lĭnh găh hơ năp jang, tơ drong ‘lơ̆ng đơ̆ng tơ drong pơ tăm bri, tơ drong jang vei lăng bri, vei lăng cham char bri brăh, pơm tơ drong jang jrŭ să lơ̆m đĭ đăng linh, tơ gop tơ jur ƀơm ưh kơ ‘lơ̆ng đơ̆ng tơ plih tŏ ‘mi kial, hơ tŏk ‘lơ̆ng tơ drong arih sa.

Thuem: Tơ blơ̆