Khŭl jang kơ Khŭl linh kon pơlei Việt Nam năm tơ̆ Thổ Nhĩ Kỳ vang dŏng tơgŭm, dŏng sar bar, hơmet pơ ‘lơ̆ng hiong răm đơ̆ng teh tơdrŏ ‘noh đei 76 ‘nu lĭnh. Đơ̆ng ‘năr 13/2 truh ‘năr 22/2, khŭl linh kon pơlei Việt Nam ‘noh đei 76 sỹ quan, lĭnh joăt jang hlôi vang năm tơgŭm ‘mêm mơnat păng dŏng tơgŭm hiong răm đơ̆ng teh tơdrŏ tơ̆ Thổ Nhĩ Kỳ, lơ̆m tơdrong tŏ ‘mi kial ưh kơ ‘lơ̆ng, khŭl hlôi tơlĕch jang tơchă tơ̆ 31 hơnih, chă ƀôh 15 hơnih đei bơngai lơ̆m dôm hnam tih păk hơlih, lơ̆m noh đei 2 hơnih đei ƀôh bơngai oei arih, hlôi pơjao ăn khŭl linh dŏng sar bar kơ păh buăl vă iŏk 28 hơkâu bơngai lôch lĕch tơ̆ ‘ngoăih.

Khŭl hlôi pơjao dang 25 tấn tơmam, phe ƀa tơmam xa tơgŭm ăn kon pơlei tơring đei ƀôh teh tơdrŏ. Tơ̆ jơ pơm lêh, Anih tơm vei lăng khŭl linh teh đak hlôi athei hơpăh Bằng khen đơ̆ng Thủ tướng teh đak ăn 4 khŭl tơpôl păng 7 ‘nu. Tơ̆ lêh pôk pơ ư, pơ đĭ 76 ‘nu kơ khŭl hlôi đei pôk hơpăh bằng khen đơ̆ng Kơdră Anih tơm vei lăng khŭl linh teh đak yua kơ đei jang tôch kơ ‘lơ̆ng lơ̆m bơ̆jang kiơ̆ hơnăp jang.