VOV4.Bahnar - ‘Năr 30/6, Khul dăr lăng đơ̆ng Anih tơm vei lăng pơ tho pơ hrăm yoa Phŏ Kơ dră tơm Nguyễn Văn Phúc chĕp kơ̆l đei jơ bơ̆ jang hăm Anih pơ gơ̆r thi tốt nghiệp THPT sơ năm 2022 dêh char Dak Lak găh tơ drong hơ met ăn ‘măng thi âu.

Jơ bơ̆ jang hăm anih pơ gơ̆r thi Dak Lak

Kiơ̆ đơ̆ng hơ len năng, Khul tơ chĕng ‘lơ̆ng tơ drong hơ met ăn ‘măng thi tơ̆ dêh char Dak Lak, đơ̆ng hơ met tơ mam truh pơ tâp ăn kăn ƀô̆ vang pơ vih ăn ‘măng thi, tơ drong in đê thi, pơ truh đê thi năm tơ̆ anih thi păng vei lăng đê thi đei jang trŏ hăm tơ drong hơ găt ngăl.

Khul jang athei Anih vei lăng pơ tho pơ hrăm dêh char Dak Lak jang hơ doi mă kơ jăp hăm dôm anih đei ƀơm truh hơ met mă ‘lơ̆ng rim tơ drong. Lơ̆m nŏh athei năng kăl hlŏh dơ̆ng truh tơ drong pơ tâp pơ hrăm trong vei lăng, pơ vih ăn tơ drong thi sơ năm ‘nâu yoa đei lơ tơ drong tơ plih ‘nao. ‘Măng thi âu, Dak Lak đei hlŏh 20.400 ‘nu hŏk tro vang thi. Dêh char hơ met 32 anih thi hăm 869 lăm thi tơ̆ 15 apŭng, thĭ xăh păng plt.

Dơ̆ng: Tơ blơ̆