Tơ̆ jơ pơm lêh, Đại tướng Nguyễn Trọng Nghĩa, Kơdră chĕp kơ̆l Anih jang chinh trĭ kơ Khul linh kon pơlei Việt Nam, tang măt ăn kơdră chĕp kơ̆l Đảng, Teh đak pơjao Hơnăn Khul linh tơblăh kơtang nuih mơng kơ kon pơlei ăn Anih tơroi tơbăt. Tang măt ăn Quân ủy Trung ương, kơdră chĕp kơ̆l Anih tơm vei lăng khul linh teh đak păng Anih jang Chinh trĭ, Đại tướng Nguyễn Trọng Nghĩa pơma hơdăh, 80 sơnăm âu ki, Anih tơroi tơbăt ling lang jang đang 'lơ̆ng tơdrong jang roi tơƀôh trong jang tơm găh đon tơchĕng, joh ayŏ kơdŏ xoang lơ̆m khul linh.

Dôm sơnăm truh, tơdrong lơ̆m apŭng plenh teh, tơ̆ tơring đei tơdra hơnơ̆ng kơ tơplih, tôch kơ krê, Đại tướng Nguyễn Trọng Nghĩa pơma hơdah, dôm khul ayăt, khul iung tơjră hơnơ̆ng hơtŏk tơdrong tơjră phă ngơ̆r hăm trong jang roi đunh roi hlơp; dôm tơdrong 'nao đei tơ̆ yăn âu kŭm hăm tơdrong đei ƀơm truh ưh ‘lơ̆ng đơ̆ng tơdrong jang mŭk drăm kiơ̆ chăl 'nao, đơ̆ng mạng tơpôl păng dôm tơdrong ưh sơđơ̆ng 'nao đei, hlôi tơlĕch nơ̆r athei roi kơjung hăm tơdrong jang găh đon tơchĕng, joh ayŏ kơdŏ xoang kơ Khul linh.