Kơdră 2 pah sơkơ̆t hơdah pơtoi kơhret kơjăp hloh tơdrong Jang tơbôl tôm tơdrong, lơ̆m noh đei tơdrong hơtŏk asong jang lơ̆m tơchăr hơgei 'Măng jang kơpal teh (Global Gateway) păng tơdrong Jang tơbôl tơplih 'lơ̆ng unh hơyuh hơtŏ hơnơ̆ng (JETP); ră hơdah tơdrong kăp gĭt kơ tơdrong pơm kiơ̆ tôm Tơchơ̆t tĕch pơdro Hiôk hian Việt Nam – EU (EVFTA) păng hrôih kĭ pơkăp Tơchơ̆t Vei vêr asong jang Việt Nam – EU (EVIPA).

Ƀar pah adoi drơ̆ng nơ̆r pơkăp truh hơtŏk jang hơdoi tơmam drăm kăl pơm jang; pơtoi hơtŏk jang hơdoi gah kơmăi kơmŏk trong jang 'nao, pơtho pơhrăm, tơplih jơk, hơnih jang tơm, jang mŭk drăm sơđơ̆ng păng mŭk drăm đak dơsĭ. Ƀar pah sơkơ̆t hơdah hơtŏk jang păng vei vêr sơnong pơyua ăn kon bơngai. Ƀar pah ră hơdah tơdrong kăp gĭt păng jang đei jơnei gah tơchơ̆t jang hơdoi lơ teh đak păng vei sơđơ̆ng tơpôl apŭng plenh teh gơnơm đơ̆ng luơ̆t pơkăp. Kơdră Jơnŭm Châu Âu António Costa păng Kơdră Hơnih jang Châu Âu Ursula von der Leyen bơnê kơ sơnong jang kăp gĭt 'lơ̆ng đơ̆ng Việt Nam lơ̆m ASEAN. Kơdră 2 pah hơpơi 'meh Hop akŏm kơpal tơbăt 50 sơnăm iung jang tơbôl ASEAN – EU ah sơnăm 2027.