Tơ̆ tơƀơ̆p. Kơdră tang măt Việt Nam tại Bỉ, Kơdră Khul tang măt Việt Nam tơ̆ Jơnŭm atŭm châu Âu Nguyễn Hương Trà tơbăt, dang ei đei dang 1 triu 500.000 ‘nu kon pơlei bơngai Việt Nam hơrih sa tơ̆ châu Âu. Kon pơlei roi năr roi atŏk tơ iung, mơ̆t hơdoi ‘lơ̆ng hơ iă, tơgoăt tơgoăl, vei kơjăp tơdrong oei sa joăt joe păng đei lơ tơdrong tơgop ăn pơlei pơla, teh đak. Iung pơma tơ̆ ou, Tổng Bí thư, Kơdră chĕp pơgơ̆r Teh đak Tô Lâm hôn bơnê kơtang dôm tơdrong tơgop đơ̆ng kon pơlei Việt Nam tơ̆ châu Âu, mă kăl ‘noh hơnăp jang kơ Khul lơ̆m hơmet pơ ‘lơ̆ng tơgoăt tơgoăl pôm nơ̆r ƀơ̆r đon păng pơtrŭt kơtang tơgoăt dih băl ‘lơ̆ng hơ iă ƀar păh Việt Nam hăm rim teh đak. Pơma hơdăh teh đak tŏk bŏk yak mơ̆t lơ̆m jăl atok tơ iung ‘nao, Tổng Bí thư, Kơdră chĕp pơgơ̆r Teh đak athei kon pơlei oei tơ̆ teh đak đe hơnơ̆ng jang kiơ̆ ‘lơ̆ng jơhngơ̆m đon gơh hơgei, tơnăp; tơgoăt dih băl hơnih mơdro sa, khul joăt jang păng pơtrŭt kơtang pơtho tơbăt khoa hŏk, kmăi kmŏk ăn teh đak. Rim hơnih tang măt Việt Nam tơ̆ teh đak đe kăl jang ‘lơ̆ng bơ̆ jang vei lăng năng tông kon pơlei, tơgŭm djru kon pơlei, pơjing rơvơn vă kon pơlei tơgop ‘lơ̆ng hơ iă găh tơ iung pơjing păng atŏk tơ iung teh đak.