Hăm tơlĕch nơ̆r tơbăt “Pơjing đei kơjă-Tơroi tơdrong Việt-Pơjing ‘lơ̆ng choh jang sa, ‘nhĕm ‘nhot păng tơmang pơhiơ̆ ‘lơ̆ng hơ iă”, hop akŏm akŏm lơ̆m trong tơgoăt dih băl kon pơlei choh jang sa hăm hơnih mơdro sa pơm tơlĕch, tĕch mơdro păng tơmang pơhiơ̆; hơmet pơ ‘lơ̆ng hơnih jang pơtăm, jang kiơ̆ kmăi kmŏk, tơ iung pơjing hơnăn păng pơih să hơnih tĕch răt lơ̆m apŭng plĕnh teh.

Lơ̆m choh pơtăm, trong tơlĕch ăn ‘noh kăl vei lăng ‘lơ̆ng, sơđơ̆ng tơmam drăm tĕch mơdro măh mai păng trŏ lăp hăm tơdrong pơkăp ‘lơ̆ng đơ̆ng pang răt iŏk. Lơ̆m pơm tơlĕch, rim kmăi kmŏk nhen hơmet pơ ‘lơ̆ng pơm tơlĕch, sơ̆k hrĕng ‘lơ̆ng atum hăm kơdŭng tăh ‘mong sinh hŏk păng hơlen băt tơm a la chă vă pơm pơđunh jơ ‘năr vei lăng, pơm dă ƀiơ̆ kơrăm păng pơjing đei lơ tơmam drăm. Tơdrong iŏk yoa rơ̆m rĕk tơmam choh pơtăm jei tơgop pơm atŏk kơjă gĭt kăl, pơm tơjur tơdrong ‘mê̆ ‘mach.

Tơbăt trong joăt iŏk yoa kmăi kmŏk lơ̆m rong kon tơrong păng vei lăng ‘lơ̆ng đak toh rơmo, ƀok Đoàn Trung Kiên, Kơdră chĕp pơgơ̆r Hơnih rong rơmo iŏk đak toh NutiMilk tơ̆ tơring Mang Yang, Gia Lai, tơbăt, kmăi kmŏk vei lăng năng tông rơmo đei chih tơmơ̆t hơnơ̆ng, tơgŭm djru ăn vei lăng năng tông rơmo pran jăng ‘lơ̆ng hơ iă. “Hăm akŏp rơmo đei truh 12.000 tŏ, ‘noh tơdrong tơmơ̆t jên jang, jang kiơ̆ kmăi kmŏk gơh hơgei lơ̆m vei lăng năng tông rơmo kăl đei iung jang kiơ̆. ‘Nou jĭ kmăi kmŏk vei lăng năng tông kơ Israel. Lơ loh kư̆ mă 10 pơnĭt đei dôm tơdrong kơtơ̆ng ang găh rơmo đei chĭh tơmơ̆t, găh tơdrong rơmo chă yơ yak, chă sa, hơlen băt găh pran jăng lơ liơ.”

Ưh hơdrô̆ 'lơ̆ng gah tơmam drăm, tơdrong hơnhăk tơmam choh pơtăm truh hăm bơngai răt yua kiơ̆ đơ̆ng 'nhot xa, tơdrong tơroi kơ tơring păng hơlen băt gah tơmang pơhiơ̆ kŭm đei sơkơ̆t hơdah jing trong jang kăp gĭt. Tơdrong mă ou kăl đei tơdrong vang jang đơ̆ng kon pơlei, bơngai pai xa, đe ngê̆ nhơ̆n, bơngai jang khua hŏk păng hơnih jang 'nhăk tơmoi chă tơmang lăng. Dôm tơdrong tơroi gah tơmam drăm xa, tơdrong jang juăt jue athei gơnơm đơ̆ng tơdrong pơyua tơpă; kon pơlei tơ̆ tơring athei vang jang păng đei xa yua mă hơtŏ hơnơ̆ng.

Yă Nguyễn Thị Thanh Lịch, Phŏ kơdră Hơnih vei lăng kon pơlei dêh char Gia Lai akhan, mŭk drăm kơ tơring groi kông truh tơring đak dơsĭ 'noh hiôk hian ăn tơring hơtŏk jang kiơ̆ pơkăp choh jang xa tơguăt hăm tơmam drăm xa păng tơmang pơhiơ̆. Mă lei, vă mŭk drăm ou jing trong pơm jang đunh đai, kon pơlei kăl băt hơdah gah tơring tĕch răt, tơdrong jang tĕch mơdro păng tơgŭm gơh tơrĕk truh dôm tơchơ̆t tĕch tơmam ăn teh đak đe: “Jang mŭk drăm choh jang xa, kon pơlei athei băt đei tơmam drăm mă kơdih po pơm tơlĕch, gơh tĕch hlot thoi yơ. Kăl băt hơdah gah tĕch tơlĕch ăn tơring Châu Âu 'noh athei vei sơđơ̆ng dôm tơdrong kiơ, tĕch ăn teh đak Trung Quốc 'noh thoi yơ. Noh bơ̆n athei hlôh vao hơdah. Tơdrong jang kơ dêh char, kơ khul kơdră rim hơnih jang, rim tơring athei yak hơdoi, chih akŏm luơ̆t tơchơ̆t mă kơjăp, pơchoh trong jang, tơgŭm ăn kon pơlei lơ̆m khei năr ƀơm tơnap tap”